Labarik sira partisipa iha kampaña Kandidatu Prezidente Repúblika períodu 2022-2027, Francisco Guteres 'Lu Olo', iha kampu Futeból Dom Bosco, Comoro, segunda (14/03). Imajen TATOLI/Francisco Sony.

COVALIMA, 08 abril 2022 (TATOLI)—Komisaun Nasionál Eleisaun (CNE, sigla portugés) identifika labarik sira partisipa iha kampaña eleitorál durante kandidatu prezidente repúblika sira hala’o kampaña ba eleisaun segunda volta iha Covalima.

“Durante kandidatu Prezidente Repúblika José Manuel Ramos Horta ho númeru sorteiu 01 no Francisco Guterres Lú-Olo ho númeru sorteriu 02 realiza kampaña iha Covalima, ami nafatin  identifika labarik sira partisipa iha kampaña eleitorál,” Diretór CNE Covalima, Hermenegildo de Sena, informa ba Agência Tatoli iha nia knar fatin, Kampung Baru, sesta ne’e.

Bazea ba observasaun hosi ofisiál CNE katak kampaña eleitorál eleisaun primeira volta no kampaña eleitorál ba segunda volta ne’e, CNE identifika labarik sira partisipa nafatin.

“Maske ami hato’o ona informasaun ba iha nasionál kona-ba partisipasaun labarik iha kampaña eleitorál, maibé kampaña eleisaun segunda volta mós labarik sira nafatin partisipa,” nia informa.

Labarik sira-ne’ebé partisipa iha kampaña ne’e la’ós labarik sira rasik mak hakarak ba partisipa maibé tanba família hanesan inan-aman ka sira-nia maun no bin sira mak lori sira ba partisipa. 

Bazea ba regra, labarik sira labele partisipa iha kampaña tanba sira-nia tinan seidauk to’o, seidauk iha kartaun eleitorál no seidauk iha direitu atu ezerse sira-nia direitu votu hodi hodi hili kandidatu prezidente repúblika ida.

Sidadaun ne’ebé iha kartaun eleitorál bele partisipa iha kampaña eleitorál hodi rona programa ne’ebé hato’o hosi kandidatu prezidente repúblika períodu 2022-2027 maibé labarik sira labele partisipa.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here