Ministra Saúde, Odete Maria Freitas Belo, kuda ai-oan iha resintu Ministériu atu proteje saúde ambientál. Imajen/ Felicidade Ximenes

DILI,07 abríl 2022 (TATOLI)—Ministériu Saúde (MS) hamutuk ho Organizasaun Mundiál Saúde (OMS),kinta ne’e, selebra loron mundiál Saúde  liuhosi kuda ai-oan hamutuk 20 iha resintu ministériu refere atu proteje saúde ambientál.

Biban ne’e, Ministra Saúde, Odete Maria Freitas Belo, hateten inisiativa kuda ai-oan ne’e iha importante atu proteje planeta hosi dezastre naturál.

“Ohin, ita selebra loron mundiál saúde ho tema ita-nia planeta ho ita-nia saúde, maibé dalabarak ita problema ho ita-nia ambiente  liuliu lixu sira ne’ebé mak  iha, nune’e serbisu sira ne’e la’ós Ministériu Saúde  nia de’it, maibé ministériu relevante  sira  seluk atu haree ba asuntu sira ne’e,”Minsitra Saúde hateten ba jornalista sira bainhira ramata selebra loron mundiál saúde iha salaun Ministériu Saúde-Caicoli, kinta ne’e.

Governante ne’e mós husu ba populasaun atu evita halo uma iha área risku sira tanba fó ameasa ba vida.

“Polusaun ar sira ne’ebé mak iha afeta tebes ba saúde públika  hanesan polusaun karreta, tabaku  kauza ba moras kankru pulmaun,” nia afirma.

Nune’e, Nia dehan loron ida ne’e importante tebes tanba kada tinan nasaun hotu inklui Timor-Leste mós hola parte iha komemorasaun ida ne’e hodi sensibiliza populasaun kona-ba importánsia no valór atu preserva saúde hodi hadia kualidade moris.

“Ha’u hakarak fó apelu ba populasaun tomak atu kontinua halo plantasaun iha uma, iha ita-nia komunidade, munisípiu, nune’ mós iha fatin públiku sira hanesan Parque, Eskola, Sentru Saúde, Óspital no edifísiu hosi Ministériu ka Sekretaria de Estadu sira hotu,” nia apela.

Ministériu Saúde hahú kampaña plantasaun árvore iha fatin ka edifísiu saúde no espera katak ho apoiu ema hotu hamutuk bele kontribui di’ak liu tan ba ambiente ne’ebé verde no reziliente ba klíma, no hamenus impaktu husi emisaun gases puluente iha atmosfera.

Reprezentante Organizasaun Mundiál Saúde iha Timor Leste Arvind Mathur, kuda ai-oan iha areadór Ministériu Saúde. Imajen/ Felicidade Ximenes.

Iha fatin hanesan, Reprezentante Organizasaun Mundiál Saúde iha Timor Leste Arvind Mathur, hateten  planeta mundu vítima ba epidemia tabaku.

“Ha’u hanoin tema ohin loron laiha tema ida ne’ebé diak ba ita, tanba ita hasoru hela pandemia COVID-19 no ita hasoru desastre naturál barak-barak ne’ebé kazu ema  hasoru natureza sira,” nia dehan.

Nune’e, nia dehan presiza fó mensajen ba populasaun ne’ebé klaru, balansu no armonia ba ekosistema sira.

Marka prezensa iha serimónia ne’e maka Reprezentante OMS Arvind Mathur, Reprezentante UNICEF Timor-Leste Dr. Bilal Aureng Zen Durrani, Reprezentante WFP Timor-Leste Dr. Dageng Liu,  USAID iha Timor-Leste, Uniaun Europeia iha Timor-Leste, Kordenadór Birgada Médiku Kubanu, Reprezentante husi Sekretáriu Estadu Meiu Ambiente, Reprezentante Autoridade Munispál Dili no seluk tan.

Jornalista : Felicidade Ximenes

Editór        : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here