Kandidatu Prezidente Repúblika, Francisco Guterres Lú Olo, hala’o kampaña dala-neen (6) iha Sentru Konvensaun Baucau. Imajen Tatoli/Anito Soares.

BAUCAU, 07 abríl 2022 (TATOLI)—Kandidatu Prezidente Repúblika periódu 2022-2027 ho númeru sorteiu rua (2), Francisco Guterres ‘Lú Olo’, kinta ne’e hala’o atividade kampaña ba loron daneen ho tipu diálogu ho militante no apoiante sira iha Sentru Konvensaun Baucau.

Notísia Relevante: Reelitu: Lú Olo reafirma sai Prezidente Repúblika ba povu tomak

Kandidatu ne’e hato’o kompromisu polítiku katak, bainhira reeleitu sai Xefe Estadu ba mandatu daruak mak sei hametin liu tán relasaun instituisional ho órgaun soberania sira seluk hodi servi Estadu, tanba PR sei garante pás no estabilidade no funsionamentu instituisaun Estadu.

“PR mós hanesan titulár órgaun soberania boot tebes iha ita-nia rain no atu hetan lejimitidade hosi povu liuhosi eleisaun ne’ebé livre demokrátivu. Tanba ne’e, sai sasukat eleisaun kada tinan lima hili Xefe Estadu ho loloos halo exersisu podér polítiku liuhosi konstituisaun bainhira tenke relasaun di’ak ho órgaun soberania seluk hanesan Parlamentu Nasionál, Governu no Tribunál sira atu ida-idak iha kna’ar hodi kompleta Estadu servi povu,” Lú Olo hateten.

Militante, simpatizante no apoiante Kandidatu Prezidente Repúblika, Francisco Guterres Lú Olo, partisipa kampaña dala-neen (6) iha Sentru Konvensaun Baucau. Imajen Tatoli/Anito Soares.

PR mós iha relasaun instituisional hodi ko’alia ho ezekutivu atu implementa programa importante ba nesesidade povu, no relasaun Prezidente Repúblika importante ho Governu ne’ebé iha influénsia majistratura hodi haree iha área ne’ebé afeta ba povu nia moris hanesan edukasaun, saúde no bainhira iha munisípiu Baucau hasoru problema bele hato’o ba Primeiru Ministru hodi hadi’a.  

Bibán ne’e, Lú Olo kongratula Baucau-oan sira iha eleisaun primeira volta ne’e Munisípiu Baucau bele manán ho votu barak liu ho kandidatu sira seluk no eleisaun primeira ronda, ne’ebé rezulta kandidatu na’in-rua hetan mais votadu hodi compete fali iha segunda ronda.

“Ha’u fiar iha eleisaun segundu volta konfirma vitória ba Baucau-oan sira,” nia dehan.

Iha konstituisaun repúblika artigu 74 (definisaun) iha alínea 1 hateten Prezidente Repúblika maka Xefe-Estadu, símbolu no garantia independénsia nasionál no unidade Estadu nian, no instituisaun demokrátika sira-nia funsionamentu regular; no iha alínea 2 hateten Prezidente Repúblika maka Komandante aas liu forsa armada nian.

Nune’e mós, iha konstituisaun artigu 76 (eleisaun) iha alínea 1 haktuir atu sai Prezidente Repúblika, sei hili tuir sufrájiu universál, livre, diretu, sekretu no ida-idak.

Alínea 2 hateten, eleisaun Prezidente Repúblika nian banati tuir sistema manán ho votu barakliu hosi votu hotu-hotu ne’ebé válidu, la sura votu ne’ebé la valid.

Alínea 3 ne’e dehan, bainhira kandidatu sira hetan votu hanesan, sei hala’o fali eleisaun dala ida tan, liutiha loron tolunulu husi loron votasaun ida foin liubá kotuk.

Ikus liu, alínea 4 katak iha eleisaun daruak, kandidatu na’in-rua ne’ebé hetan liu votu no la hasai sira-nia kandidatura mak bele tuir.

Enkuantu, tuir rezultadu apuramentu munisípiu Baucau ba eleisaun prezidensiál primeira volta kandidatu Lú Olo manán iha munisípiu Baucau ho votu 27.463 (40,15%) hosi totál eleitór na’in-71.137, no kandidatu Prezidente Repúblika José Ramos Horta, hetan votu ho totál 15,898 (23,25%).

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here