Profesór João da Costa Amaral. Imajen Tatoli/Celestina Teles.

COVALIMA, 06 abríl 2022 (TATOLI)—Hosi dadeersan ba dadeersan seluk, nia la’o ho esperansa hakat ba eskola atu hala’o ninia dever hanesan manorin-na’in ida. La’o be la’o, hanorin be hanorin, to’o tempu fila ba uma, nia la’o ho ain todan no ho oin midar. 

Loron ba semana, semana ba fulan no fulan ba tinan, to’o tinan tolu (3) resin, nia hala’o dever hodi hanorin estudante sira iha Eskola Bázika Filiál Taroman hosi dadeer to’o meudia, durante tinan tolu nia laran ne’e, nia fila ba uma ho liman mamuk.

Kaer livru iha liman maibé nia fila ba uma ho bolsu mamuk. Kaer  lapijeira iha liman sorin maibé liman sorin seluk kaer buat mamuk ida. Pasta ne’e nakonu kadernu maibé karteira oan ida be sikat subar iha kalsa bolsu ne’e mamuk be mamuk. 

Ha’u la simu saláriu hahú iha fulan dezembru tinan 2019 to’o ohin loron, ha’u seidauk simu doit metan ida. Tanba bainhira fulan-fulan ha’u check iha banku maibé osan la tama,” Profesór Permanente iha Eskola Bázika Filiál Taroman, João da Costa Amaral, hato’o ba Agência Tatoli, iha nia rezidénsia Legore, tersa ne’e.

Manorin João da Costa Amaral hanesan profesór permanente ne’ebè hanorin estudante sira iha Eskola Bázika Filiál (EBF) Taroman, suku Taroman, aldeia Lia Na’in, iha postu administrativu Fatululik, munisípiu Covalima.

Hosi tinan ida ba tinan ida seluk, nia hakbesik an beibeik ba Servisu Edukasaun Munisípiu Covalima no hakat to’o iha Komisaun Funsaun Públiku (KFP), maibé to’o ohin loron seidauk hetan naroman musan ida hodi fó roman ba ninia esperansa be hori tempu kle’ur nia hein, hein tinan tolu resin, hein beibeik maibé nia kohe laran ne’e nuka rai netik dolar tahan oan ruma. 

Ha’u konfirma iha Servisu Edukasaun Munisípiu Covalima hodi kompleta ha’u dokumentu to’o iha Komisaun Funsaun Públika maibé to’o ohin loron ha’u check osan iha banku mós saláriu la tama,” nia hateten.

Nia liman-kuana kaer halimar nia kanuruk ba beibeik, nia ibun temi ho onestu katak nia la konsege simu saláriu tanba dokumentu la kompletu maibé nia hateten lia-loos katak nia kompleta ona dokumentu hodi entrega ona ba Servisu Edukasaun Munisípiu Covalima maibé mehi ne’e hela de’it mehi to’o ohin loron.

“Ha’u esforsu ona maibé to’o ohin loron seidauk hetan rezultadu. Maibé ha’u nafatin hala’o knar hodi hanorin ha’u-nia estudante sira iha Eskola Bázika Filiál Taroman,” nia dehan ho reen-to’or namkurut lulun sa’e ba leten. 

Diretór Edukasaun Munisípiu Covalima, Rui Amarál Suri Seran hateten, Profesór João da Costa Amarál la simu nia direitu durante tinan tolu (3) resin ona maibé husu profesór ne’e atu hein ho pasiénsia hodi hein prosesu.

Profesór ne’e prezisa hein tan, tanba dokumentu hotu aprova ona iha Komisaun Funsaun Públiku (KFP) no Ministériu Edukasaun Juventude no Desportu.

Profesór João nia dokumentu iha KFP no MEJD mós rezolve ona. Nia hein de’it tanba rezolve ona, entaun sei selu nia saláriu hahú hosi nia la simu saláriu to’o ohin loron,” nia klarifika. 

Enkuantu profesór sira-ne’ebé hanorin iha Eskola Bázika Filiál Taroman hamutuk na’in-haat (4) ne’ebé kompostu hosi profesór permanente na’in-tolu (3) no kontratadu na’in-ida (1).

Jornalista : Celestina Teles

Editór       : Cancio Ximenes 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here