TDD. Imajen Tatoli /Dok

DILI, 06 abril 2022 (TATOLI)- Tribunal Distrital Dili (TDD), kuarta ne’e, halo audénsia julgamentu ba arguido UDC no ZXL ne’ebé deskonfia prátika krime abuzu konfiansa iha Asosiasaun Defisiénsia Matan ka East Timor Blind Union (ETBU).

Tuir faktu akuzasaun hosi Ministériu Públiku (MP) ba prosesu ne’e katak arguidu UDC simu knaar nu’udar Diretór iha Asosiasaun East Timor Blind Union (ETBU) ba períodu 2018 tooo 2022 no arguida ZXL maka nuudar responsável iha área finansa nian.

Iha loron 26 juñu iha tuku 11:00, arguidu UDC foti karreta Hilux propriataria hosi Asosiasaun ETBU iha sede iha Bekora ba tau iha arguidu nia uma no la entraga fila-fali karreta ne’e ba ETBU.

La’ós arguidu UDC de’it mak foti karreta, maibé arguida ZXL nu’udar resposável ba Finansa Asosiasaun ETBU foti mós komputadór ida ho mákina imprime ida ho marka HP iha sede asosiasaun ETBU no la intrega fali to’o agora.

Iha juñu 2020 nia laran ETBU labele halo atividade tanba karreta no komputador inklui mákina imprime sira ne’e iha hela arguidu na’in-rua.

Konsekuénsia hosi arguidu nia hahalok ne’e, rezulta asosiasaun labele halo serbisu, maske arguidu sira hatene katak sasan sira ne’e propriedade ba asosiasaun ETBU nian, maibé arguidu sira lori ba uma hanesan sira nia privadu.

Nune’e, iha loron 26 Junu 2020, membru hosi Asosiasaun ETBU eleitu fali ho inisiál JP hodi troka arguidu UDC nian fatin hanesan Diretór ba Asososiasaun ETBU hodi bele funsiona fila fali servisu sira Asosiasaun ETBU. 

Ho hahalok Arguidu nain rua nian, Ministériu Publiku akuza arguidu sira ho krime abuzu de konfiansa agravadu ne’ebé previstu iha artigu 257 hosi kódigu Penál Timor-Leste.

Hatán ba akuzasaun ne’e, Arguidu UDC konsidera akuzasaun MP nian ne’e faktu balun loos balun sala.

Iha fatin hanesan,  Arguida ZXL dehan loos duni iha momentu ne’ebá nia foti duni komputador ida no mákina imprime ida hodi halo serbisu liuliu atu halo relatóriu serbisu.

Hafoin tribunal rona tiha arguidu nain-rua, Tribunál deside adia julgamentu ne’e ba loron seluk hodi kontinua rona lezadu JP nia deklarasaun.

Prosesu julgamentu ne’e preside hosi juis koletivu Argentino Luisa Nunes, Alvaro Maria Freitas, Antonio Gonsalves, Ministériu Públiku reprezenta hosi Prokuradór Reinato Berenahak no arguidu sira hetan asisténsia legál husi defensó públiku João Carvalho.

Jornalista: Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here