Primeira-Ministra interina no atuál Ministra Solidariedade Sosiál no Inkluzaun, Armanda Berta dos Santos, lidera reuniaun Konsellu Ministru, iha Palásiu Governu, kuarta (06/04). Imajen TATOLI/Francisco Sony

DILI, 06 abril 2022 (TATOLI)—Membru Konsellu Ministru (KM) rona aprezentasaun hosi Ministru Koordenadór Asuntu Ekonómiku (MKAE), Joaquim Amaral, kona-ba progresu sira ne’ebé alkansa ona iha prosesu adezaun Timor-Leste ba Organizasaun Mundiál Komérsiu (OMK).

“Ohin ita rona aprezentasaun kona-ba nesesidade apoiu iha nível polítiku no tékniku ba prosesu adezaun nian, liuliu atu aselera elaborasaun ba lejizlasaun pendente no reforma interna sira, hodi fasilita atividade komersiál sira no kria ambiente ida favorável ba setór privadu, nasionál no estranjeiru, nune’e bele kumpre prinsípiu jerál OMK nian,” Ministru Prezidénsia Konsellu Ministru interinu, Rui Augusto Gomes, hateten hafoin reuniaun ezekutivu, iha Palásiu Governu, kuarta ne’e.

Notísia relevante: 29 abril, Timor-Leste sei aprezenta dokumentu OMK iha Jenebra

Biban ne’e, Ministru Joaquim aprezenta mós roteiru indikativu ida iha faze prosesu tuirmai atu nune’e to’o tinan ne’e nia rohan prosesu adezaun Timor-Leste bele konklui ona.

Antes ne’e, MKAE realiza reuniaun datoluk ho komisaun interminiteriál adezaun  Timor-Leste ba OMK iha loron (04/04) hodi fó apresizaun ba serbisu ekipa téknika ne’ebé aprezenta dokumentu molok aprezenta ba Konsellu Ministru no lori aprezenta iha reuniaun grupu traballu iha Jenebra, iha loron 29 abril.

Durante ne’e Timor-Leste hamutuk ho país 22 seluk sai observadór hodi akompaña prosesu no kumpre rekezitu hodi sai membru hanesan ho nasaun 164 sira seluk.

Hanesan país observadór, Governu estabelese grupu traballu ba OMK hanesan komité traballu hodi halo preparasaun, negosiasaun, prienxe rekezitu no tuir enkontru koordenasaun ho Estadu membru.

Adezaun ba organizasaun mundiál ne’e ho hanoin ida katak Governu bele halo parseria ho setór privadu nasionál no internasionál atu loke kampu traballu ba timor-oan.

OMK hanesan organizasaun ne’ebé regula komérsiu entre país sira ho objetivu atu garante katak atividade komersiál hotu la’o ho forma fasil, livre, previzível no posível.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here