DILI, 06 abril 2022 (TATOLI)—Governu liuhosi desizaun Konsellu Ministru (KM) delibera hodi fó autorizasaun ba Ministrériu Finansa (MF) atu negosia ho Banku Mundiál kona-ba kondisaun espesífika sira ba empréstimu hodi finansiamentu projetu fornesimentu bee-moos ba sidade Dili.
Projetu ne’e aprezenta hosi Ministru Finansa, Rui Augostu Gomes, ho nia objetivu atu aumenta área kobertura ba serbisu abastesimentu bee-moos no hadi’a kapasidade institusionál Bee Timor-Leste, Empreza Públika (BTL, E.P) nian.
“Projetu ne’e ho valór millaun $123,37 maihosi empréstimu,” Ministru Prezidénsia Konsellu Ministru Interinu, Rui Augostu Gomes, hateten, iha Palásiu Governu hafoin ramata reuniaun KM, kuarta ne’e.
Notísia relevante: 2022: BTL, E.P sei implementa konstrusaun fíziku mellora bee-moos
Projetu fornesimentu bee-moos ne’e ho nia durasaun tinan-hitu, hahú hosi tinan 2023 to’o 2029 no sei benefisia ba ema na’in-82.300 iha munisípiu Dili.
Jornalista : Arminda Fonseca
Editora : Julia Chatarina
