Vise-Ministru Edukasaun Juventude no Desportu (MEJD), António Guterres. Imajen TATOLI/Vitorino Lopes da Costa

VIQUEQUE, 06 abril 2022 (TATOLI)—Vise-Ministru Edukasaun Juventude no Desportu (MEJD), António Guterres, kuarta ne’e, lansa vasina Pfizer iha Eskola Ensinu Báziku Sentrál (EBC, sigla portugés) 13, iha postu Uatucarbau, munisípiu Viqueque, hodi hasa’e imunidade estudante ho idade 12 to’o 17.

“Ha’u hato’o parabéns ba inan-aman sira ne’ebé iha konsiénsia no kolabora di’ak ho Governum liuliu Ministériu Saúde (MS) hodi  autoriza oan sira simu vasina,  tanba vasina ne’e importante tebes atu hasa’e imunidade,” Vise-Ministru hateten iha resintu eskola iha postu Uatucarbau.

Nune’e, governante ne’e hameno, bainhira inan-aman sira iha dúvida ruma tenki konsulta ho ekipa saúde hodi hetan esplikasaun no karik estudante balun moras tenki nakloke ho parte saúde hodi hetan tratamentu.

“Vasina bele proteje ita-nia an hosi moras COVID-19 no bele aumenta liután ita-nia imunidade kontra COVID-19 ne’ebé espalla iha mundu inklui Timor-Leste,” nia akresenta.

Notísia relevante: Estudante Calixa Viqueque na’in-225 simu ona vasina Pfizer

Iha fatin hanesan, Diretór Eskola EBC 13 Uatucarabau, Acacio de Sousa, informa, eskola ne’e  iha estudante hamutuk na’in-232 maka simu ona vasina Pfizer.

“Bainhira ekipa saúde mai halo levantamentu dadus iha eskola ne’e, ami informa kedas ba  inan-aman hodi mai rona esplikasaun kona-ba saúde tanba saúde ne’e iha ita-nia liman rasik. Estudante sira-nia inan-aman mós aseita fó vasina ba sira-nia oan no moras saida de’it parte saúde maka bele deteta moras,” nia tenik.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here