Diretór Jerál STAE, Acilino Manuel Branco. Imajen TATOLI/Egas Cristóvão

DILI, 06 abríl 2022 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten Impreza Nasionál Timor-Leste (INTL) finaliza ona produsaun bulletin votu ba segunda volta no sei halo verifikasaun.

Notísia Relevante: INTL hahú imprime buletin votu ba eleisaun prezidensiál segunda volta

“Produsaun bulletin votu ne’e finaliza ona no falta de’it mak atu verifika tuir, keta iha balun ne’ebé mak foer no sei tau númeru seriál ba bulletin votu sira. Parese iha loron 13 abríl mak sei entrega ba STAE no sei transporta ba munisípiu 12 inklui Rejiaun Administrativu Espesiál Oé-Cusse Ambeno (RAEOA) no diáspora,” Acilino Manuel Branco hateten ba Agência TATOLI, iha nia knaar fatin Caicoli, Dili, kuarta ne’e.

Produsaun ba buletin votu ne’e hahú iha loron 31 marsu 2022 no sei konklui iha loron 12 abril 2022, maibé INTL esforsu makaas nune’e finaliza ona semana ne’e (horisehik) no hein verifika de’it. 

Diretór ne’e hatutan, INTL nafatin imprime bulletin votu ho númeru ne’ebé mak hanesan iha primeiru volta no sei aumenta de’it mak eleitór ne’ebé iha fulan abríl nia-laran idade kompleta 17 hamutuk 312.

Tuir nia, ohin no aban STAE sei distribui materiál naun sensitivu ba munisípiu 12 inklui RAEOA tanba materiál balun ne’ebé mak uza iha eleisaun dahuluk ne’e aat ona, entaun presiza lori fali foun hodi troka mak hanesan kabina votu balun.

Nune’e, nia apela ba eleitór sira-ne’ebé mak iha primeira volta vota iha sentru votasaun paralelu nian katak nafatin vota iha fatin refere no sira-ne’ebé mak naran la taka iha fatin votasaun paralelu, husu nune’e fila ba ida-idak nian joegrafika ka moris fatin atu bele ezerse imi-nia diretu votu ba kandidatu ne’ebé mak imi fihir.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here