MAE entrega ekipamentu inforátiku ba Xefe suku sira, iha salaun Administrasaun munisípiu Viqueque, tersa (05/04). Imajen TATOLI/Vitorino Lopes da Costa

VIQUEQUE, 05 abril 2022 (TATOLI)–Ministériu Administrasaun Estatal (MAE), tersa ne’e, distribui ona ekipamentu informátiku ba suku hamutuk 36 iha munisípiu Viqueque hodi fasilita servisu administrasaun suku.

“Ita ofisialmente distribui komputadór ho marka Dell no imprime marka HP laser jet 107w ba suku 36 iha munisípiu Viqueque hodi hadi’a jestaun administrasaun suku, tanba tinan barak ona laiha fasilidade,” Diretór Jerál Dezenvolvimentu Área Rurál, Rosito Guterres, hateten liuhosi ninia diskursu iha seremónia distribuisaun ekipamentu ba xefe suku sira, iha salaun administrasaun munisípiu Viqueque, tersa ne’e.

Notísia relevante: MAE husu xefe suku labele utiliza fasilidade Estadu atende atividade partidaria

Ekipamentu ne’ebé distribui ba kada suku sira kompostu hosi komputadór marka Dell ida, mákina imprimi ida no UPS prolink ida.

Polítika MAE ninia maka hadi’a jestaun administrasaun iha nível suku, tanba ne’e aloka orsamentu ba tinan 2021 hodi sosa ekipamentu tau iha sede suku.

“Aleinde ne’e, polítika MAE hanesan dezentralizasaun aliña ona iha dekretu lei nú.3/2016, hakarak kria kondisaun atendimentu iha nível baze, liu-liu iha suku sira,” nia akresenta.

Maski nune’e, Diretór Jerál admite, suku balun seidauk asesu ba eletrisidade, maibé  xefe suku bele foti sasán sira hodi tau iha sede suku, hafoin autoridade haree fali kestaun eletrisidade,” nia tenik.

Iha fatin hanesan, Administradór munisípiu Viqueque, Januário Soares ‘Bolly’, apresia ho inisiativa Governu, tanba durante ne’e laiha fasilidade hodi apoiu xefe suku sira, maibé agora distribui ona ekipamentu hodi tulun xefe suku sira.

“Ha’u agradese ba Governu sentrál ne’ebé fó ona apoiu komputadór no mákina imprime ba xefe suku sira hodi tau iha administrasaun suku hodi halo atendimentu ba populasun sira ne’ebé presiza trata dokumentu ruma,” nia hato’o.

Seremónia ne’e partisipa hosi Administradór postu lima inklui xefe suku hosi suku 36.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here