Bus ne’ebé halo movimentu Dili-Viqueque para iha jardín 1959 Viqueque, tersa (05/04). Imajen TATOLI/Vitorino Lopes da Costa

VIQUEQUE, 05 abril 2022 (TATOLI)–Relasiona ho folin kombustível sa’e, nune’e hahú tersa ohin, kondutór bus Viqueque deside la halo movimentu Dili-Viqueque. 

“Ohin ami kondutór bus sira hotu deside la halai tanba folin mina sa’e maka’as. Tanba ne’e, ami deside para, ita halai bá-mai dala ruma osan mina mós la to’o,” Reprezenta kondutór bus La Waioli, Jeramano Guterres, hateten ba Agência TATOLI, iha Viqueque villa.

Nia haktuir, horiseik konsege enxe mina iha Baucau, litru ida ho presu $1.45, iha estasaun kombustível iha munisípiu Viqueque, litru ida $1,34.

“Ami horiseik enxe mina gazoel iha estasaun kombustível Merkdu Fuel Baucau litru ida ho folin $1,45, ida-ne’e osan atu enxe mina la sufisiente. Tanbe ne’e maka ami kondutór bus deside la halo movimentu,” nia akresenta.

Notísia relevante: Folin kombustível sa’e tanba impaktu merkadu mundiál

Aleinde ne’e, kondutór transporte públiku ne’e sujere bus hasa’e folin billete mak foin bus halai no bainhira folin normál mak folin billete foin normál.

“Antes ne’e, kada ema na’in-ida selu billete $8, ne’ebé agora ho folin kombustível sa’e, ami hakarak pasajeru selu $10 Dili-Viqueque bá-mai,” nia sujere.

Iha fatin ketak, Responsável estasaun konbustível Jesria Fuel, Julião da Costa Panão, esplika, folin mina importasaun sa’e ho nune’e folin kombustível iha rai-laran adapta ba situasaun ne’e.

“Iha ami-nia fatin, Gazoel litru ida ho kustu $1,34, nune’e ami mós hetan ninia lukru, la’ós ami hasa’e folin mina tuir ami-nia hakarak,” nia hato’o.

Julião da Costa konta tuir, antes ne’e gazoel litru ida folin $1,24 no gazolina ho folin $1,19, maibé presu mina foin sa’e iha loron domingu (03/04).

Enkuantu, presu mina iha estasaun konbustível Borala iha Viqueque, daudaun ne’e gazoel no gazolina kada litru ho folin $1,35.

Tuir observasaun Agência TATOLI iha terrenu nota katak bus hamutuk 15 ne’ebé halo movimentu hosi Dili-Viqueque, daudaun para de’it iha jardín 1959.

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here