Profesór na’in-152 tuir formasaun siénsia naturál no matematika iha salaun eskola Sekundáriu Jeráll Seran Kotek Covalima. Imajen Tatoli/Celestina Teles.

COVALIMA, 04 abríl 2022 (TATOLI)—Ministru Edukasaun Juventude no Desportu, Armindo Maia, segunda ne’e halo abertura ba formasaun siénsia naturál no matematika iha Munisípiu Covalima hodi aumenta profesór 152 nia kapasidade no kuñesimentu iha área refere.

“Ohin, ita halo abertura ba profesór sira-ne’ebé tuir formasuan iha área siénsia naturál no matematika primeiru no segundu siklu ba profesór 152 iha Covalima, ne’ebé ita hala’o ba iha territóriu laran ba profesór hamutuk 800. Formasaun ne’e ita hala’o ba profesór sira-ne’e sei hala’o iha territóriu nasionál,” Ministru Edukasaun Juventude no Desportu Armindo Maia hato’o ba jornalista sira, iha salaun eskola sekundaríu jerál públiku Seran Kotek, segunda ne’e.

Governante ne’e hateten, formasaun ba profesór ne’e hetan apoiu hosi Komisaun Nasional UNESCO Jakarta liuhosi Komisaun Nasional Timor-Leste ba UNESCO ne’ebe servisu hamutuk ho Ministériu Edukasaun Juvemtude no Desportu (MEJD).

Formasaun ba profesór sira-ne’e ho objetivu atu aumenta profesór sira-nia kapasidade iha área siénsia matematika ba primeiru no segundu siklu, ida-ne’e sai hanesan fundasaun bainhira labarik iha fundasaun la forte sei namlele.

Tanba área siensia matematika iha Timor-Leste ladún forte entaun presiza hasa’e prefesór sira-nia kuñesementu atu bele transmite no atrai ba estudante sira.

“Área siénsia matematika ita hatene ita Timor ladún forte, entaun oinsá mak ita-nia profesór sira presiza iha kuñesimentu sufisiente, nune’e mós kapasidade atu bele transmite kuñesimentu no atrai ba estudante,” nia dehan.

Ho nune’e, nia dehan, fomasaun durante loron lima (5) ne’e la’o ho di’ak nune’e ba futuru kontinua fó formasaun ba profesór sira.

“Maske ho formasaun ne’e, ita labele garante 100% maibé formasaun no edukasaun prosesu ida dinamiku no kúrikulu mós ita presiza atu hadi’a tanba ita hatene situasaun dinamiku liu-liu ho COVID-19,” nia dehan.

Profesór Eskola Primaria Bee-Matan, Virgilio Afiano Nahak reforsa, fomasaun loron ba profesór durante loron lima de’it sei la sufisiente ba profesór sira atu aprende lian maibé presiza aumenta loron.

“Ha’u hanoin formasaun durante loron lima de’it ba ha’u tempu ne’ebé mak limitadu. Ami atu aprende lian, ami presiza prolonga tempu hodi kontinua tuir formasaun tanba lian importante ba profesór sira bele estuda siénsia iha área oi-oin,” nia hateten.

Formasaun ne’e, hetan partisipasaun másimu hosi profesór sira hosi postu administrativu hitu (7) iha munisípiu Covalima.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here