Eleitór sira forma hela atu vota. Imajen Tatoli/ António Dasiparu.

COVALIMA, 04 abríl 2022 (TATOLI)—Adjuntu Sekretariadu Administradór Munisípiu Covalima, Francisco de Jesus, apela ba komunidade atu partisipa másima iha eleisaun segunda volta hodi ezerse nia direitu votu iha eleisaun prezidensiál segunda volta ne’ebé sei realiza iha 19 abríl 2022.

“Ha’u-nia mensajen ba ita-nia komunidade, inan-aman sira hotu, loron 19 fulan-abríl, ita sei realiza eleisaun prezidensiál ba faze daruak, nune’e komunidade tenke partisipa ho másíma hodi hakat ba sentru votasaun ezerse ita-boot sira-nia votu hodi hili imi-nia Prezidente Repúblika,” Francisco de Jesus informa ba Agência Tatoli iha nia knar fatin, Kampung Baru, segunda ne’e.

Tuir nia, bazea ba dadus hosi Sekretáriadu Tékniku Administrasaun Eleitorál (STAE) eleitór iha munisípiu Covalima hamutuk 47.000-resin, maibé hosi númeru ne’e iha eleisaun prezidensiál ba faze dahuluk eleitór 10.000-resin mak la tuir votasaun, entaun eleisaun ba segunda volta ne’e tenke hasa’e taxa partisipasaun komunidade nian hodi bele tuir eleisaun ho responsabilidade.

Molok atu realiza eleisaun ba daruak, AMC fó ona orientasaun ba administradór postu administrativu sira no líder komunitária sira atu mobiliza eleitór hodi partisipa másimu iha eleisaun prezidensiál ne’e.

Nia apela, hanesan sidadaun timor-oan tenke hakat ba sentru votasaun hodi ezerse ida-idak nia direitu tanba sidadaun sira-nia votu mak bele halo mudansa ba dezenvolvimentu iha rai ida-ne’e.

“Atu realiza eleisaun ba ba faze daruak ami hatun ona orientasaun ba administradór postu administradór hitu (7) no líder komunitáriu atu mobiliza eleitór hodi hasa’e taxa partisipasaun eleitór sira ezerse sira-nia votu iha munisípiu Covalima,” nia dehan.

Enkuantu, STAE covalima rejista eleitór ne’ebé atu vota hamutuk 47,476 no hosi númeru ne’e eleitór ne’ebé tuir vota iha eleisaun faze dahuluk hamutuk 37,543 ho taxa partisipasaun 79,065% no eleitór 10.00-resin mak la tuir vota.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here