Surtu dengue: óbitu na’in-48 no pasiente sa’e ba 3.894
DILI, 03 abríl 2022 (TATOLI)—Diresaun Nasionál Saúde Públika liuliu Departamentu Vijilánsia Epidemolojia iha Ministériu Saúde, relata hahú fulan-janeiru too horisheik, óbitu sa’e ba na’in-48 no pasiente 3.894.
“Situasaun kazu dengue iha Timor-Leste hosi janeiru mai too horisehik hamutuk kazu 3.894 no kumulativu óbitu na’in-48,” refere nota ne’ebé Agência TATOLI asesu, domingu ne’e.
Notísia relevante: Dengue hamate labarik na’in-46 iha Timor-Leste
Hosi total óbitu na’in-48 ne’e maioria labarik ne’ebé barak liu hosi Dili no munisípiu sira seluk.
Maioria kazu ne’e deteta hosi Munisípiu Dili ho totál 2.589, Baucau 239, Manatuto 172, Covalima 126, Ermera 107, Manufahi 159, Viqueque 64, Ainaro 45, Liquiça 109, Aileu 87, Bobonaro 44 Lautem 148 no Rejiaun Administrativa Espesiál Oé-Cusse no Ambeno (RAEOA) na’in-lima.
Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 445, Klínika Fatumeta 251, Sentru saúde Comoro 902, Sentru Saúde Vera-Cruz 204, Sentru Saúde Formoza 437, Sentru Saúde Becora 238, Klínika Madre Eliza ida, Sentru Saúde Atauro 11, Sentru Saúde Metinaro 38, Klínika Bairru-Pité 59, Klínika Motael na’in-rua no Klínika Moris Foun na’in-ida.
Nune’e, Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka sente laran sa’e, liman-ain no sikun moras hodi bele hetan atendimentu hosi profisionál saúde sira.
Apela mós Autoridade Munisipál no Autoridade Lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dal aida.
Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin.
Notísia relevante: Dengue hamate labarik na’in-46 iha Timor-Leste
Jornalista : Felicidade Ximenes
Editór : Florencio Miranda Ximenes
