Ekipa Selesaun Nasional Senior Futsal. imajen/espesial

DILI, 03 abril 2022 (TATOLI)— Ekipa Selesaun Nasionál Seniór Futsál Timor-Leste, hahú preparadu hodi jogu kontra ekipa jigante Austrália iha primeira jogu Copa AFF Championship 2022, ne’ebé hala’o iha Thailandia, aban (04/04), lokoraik.

Ekipa selesaun Nasionál Fustál hala’o ona jogu amigavél ho ekipa Thailandia ne’ebé hatudu rezultadu di’ak liuliu prepera ona tékniku no fiziku hodi kompete jogu iha eventu internasionál ne’e.

Ekipa TL kontra Australia. Imajen/Espesial

Tanba ne’e, Sekretáriu Jerál Asosiasaun Futsál Timor-Leste, Fernando Baptista, hateten, maioria jogadór hotu iha kondisaun fíziku ne’ebé mak di’ak hodi joga hasoru ekipa adversáriu.

“Kuaze jogadór hotu iha kondisaun ne’ebé di’ak, só iha na’in ida deit mak ferida (cedera) oituan,  maibé ida ne’e la fó impaktu ba ita. Nune’e ita preparadu atu jogu hasoru Austrália,” Sekretáriu Jerál Asosiasaun Futsál Timor-Leste (AFTL), Fernando Baptista Xavier, hateten ba  Agência TATOLI via rede sosiál, Domingu ne’e.

Nia dehan, bazeia ba jogu amigavél ho klube Thailandia nian dala rua tutuir malu hatudu rezultadu ne’ebé pozitivu.

“Haree ba rezultadu “try out” ne’ebé Ita halo dala rua durante iha Thailandia, ita fiar katak Ita sei halo buat ruma iha jogu mai ne’e,” nia esperansa.

Iha jogu ne’e Timor-Leste tama iha grupu B hamutuk ho Vietnam, Myanmar no Austrália. Iha ne’ebé tuir oráriu jogu dahuluk iha loron 04 abríl sei kontra Austrália, tuir mai iha loron 5 abríl kontra Vietname no no iha loron 6 abríl kontra Myanmar.

Iha jogu ne’e mak Timor – Leste hatudu rezultadu di’ak mak bele avansa ba jogu tuir mai , maibé la hatudu rezultadu di’ak mak Timor-Leste sei hela de’it iha jogu grupu.

Jogadór selesaun nasionál futsal na’in-20, maibé iha AFTL halo selesaun hodi hili de’it na’in-16 mak ba partisipa iha jogu ne’e.

Jogadór sira daudaun ne’e iha Thailandia tanba Copa AFF Futsál 2022 realiza iha Tailándia iha loron 2 to’o 10 abríl, iha Huamark Indoor Stadium, Bangkok.

Rezultadu “tray out” iha jogu amigavel entre selesaun nasional TL no klube Thailandia nian. imajen/espesial

Ekipa rua ne’ebé sai mellor klasifikasaun iha kada grupu mak sei avansa ba semifinál Copa AFF futsal 2022.

Ekipa tolu ne’ebe sai mellor klasifikasaun sertamente avansa ba Copa Asiátika Fustál 2022, iha loron 25 setembru to’o 25 outubru, iha Kuwait.

AFF ofisialmente dada sorteiu (drawing) grup sira iha Copa AFF Futsál 22, iha segunda (21/2/2022).

Rezultadu sorteiu divisaun grupu ba Copa AFF Futsál 2022, hanesan grupu A kompostu hosi nasaun Tailándia,Malazia, Indonézia, Kamboja no Brunei Darussalam.

Enkuantu grupu B, kompostu hosi nasaun Vietnam, Myanmar, Timor-Leste no Austrália.

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here