Kandidatu Prezidente Repúblika, José Manuel Ramos Horta. Imajen Tatoli/Sergio da Cruz.

OÉ-CUSSE, 02 abríl 2022 (TATOLI) – Kandidatu Prezidente Repúblika, José Manuel Ramos Horta, promete bainhira hetan fiar hosi povu sai Xefe Estadu ba períodu 2022-2027 sei promove diálogu nasionál ho partidu polítiku ne’ebé hetan asentu parlamentár.

Kandidatu ho númeru sorteiu 1 ne’e, hato’o nia kompromisu iha abertura kampaña volta daruak ho tipu komísiu, ne’ebé hala’o iha Lifau, Oé-Cusse, José Ramos Horta, introdús programa prioridade rua, mak sei rezolve uluk asuntu nasionál no internasionál.

Bainhira asume kna’ar Prezidente Repúblika ba tinan lima, prioridade dahuluk sei promove diálogu nasionál ho partidu politiku ne’ebé hetan asentu parlamentár iha uma fukun no partidu sira-ne’ebé la hetan asentu.

Nune’e mós ko’alia  ho kandidatu ne’ebé la liu iha eleisaun prezidensiál volta dahuluk no sei promove diálogo ho sosiedade sivíl sira iha Timor-Leste.

“Ha’u rona ona opiniaun barak hosi entidade hotu-hotu, kona-ba krize ekonomia no polítika ne’ebé akontese iha rai-laran, hahú iha 2018 to’ o ohin loron, tán ne’e nu’udar prezidente foun sei la buka halo persegisaun ba ema, maibé prezidente tenke rona ema hotu, no la favorese ba partidu ida ka tau de’it ema hosi partidu ida de’it tantu Estadu no Governu,” Horta ko’alia iha abertura kampaña eleisaun prezidensiál volta daruak, iha Lifau, Oé-Cusse, sábadu ne’e.

Ramos Horta sei serbisu hamutuk ho Kay Rala Gusmão hanesan autór ba negosiasaun fronteira atu rezolve uluk, inan-aman sira-ne’ebé hela iha liña fronteira hahú hosi Covalima, Bobonaro Mota-Ain mai to’o Oé-Cusse,

“Uluk, ita hotu hatene, serbisu todan boot Kay Rala Xanana Gusmão halo ona, atu rezolve problema fronteira marítima no fronteira terrestre ho Indonézia, ita tenke kontinua halo hodi hametin liután ita-nia relasaun ho nasaun viziñu sira, atu hasa’e liután ekonómia rai-laran,” Horta afirma.

Prezidente Partidu CNRT, Kay Rala Xanana Gusmão, reforsa, partidu CNRT konvida kandidatu José Ramos Horta, atu hametin fila-fila Estadu Timor-Leste nian.

“Ita hili José Ramos Horta sai Prezidente Repúblika, ohin ko’alia nia polítika ba povu Timor-Leste, sei halo tuir saida mak promete ona mai ita, Horta la’ós partidu CNRT nian, tán ne’e partidu CNRT husu ba-nia, atu sai ita-nia kandidatu tanba fiar ba nia, tanba laiha partidu, tanba krize ne’ebé mosu iha Timor-Leste, krize polítika, ekonómia no konstitusaun, entaun CNRT konvida atu sai kandidatu ba ita hotu no povu Timor-Leste atu rezolve krize sira-ne’e,” nia katak.

Diretór Komisaun Nasionál Eleisaun (CNE, sigla portugés), Tomás Oqui Meta, informa, monitorizasaun ba kampaña kandidatu Prezidente Repúblika períodu 2022-2027, iha Oé-Cusse la’o di’ak no hakmatek, militante no simpatizante-sira hatudu maturidade polítika di’ak iha ámbitu kampaña.

“Ohin iha Oé-Cusse kandidatu númeru 1 mak hala’o kampaña, kumpre oráriu kampaña ne’ebé fó sai ona hosi órgaun eleitorál, nomoos kandidatu aprezenta kompromisiu eleitorál, tuir vizaun no misaun prezidente repúblika nian,” nia apresia.

Iha komísiu ne’e hetan seguransa másima hosi PNTL-FDTL, observadór internasionál sira hosi Uniaun Europeia (UE) no Komisaun Nasionál Eleisaun (CNE, sigla portugés) no Sekretariadu Tékniku Administrasaun Eleitorál (STAE) no Provedoria Direitu Humanu no Justisa (PDHJ).

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here