Aviaun QANTASLINK tuun iha Aeroportu Internasionál Prezidente Nicolau Lobato, Comoro, kuarta (30/03). Imajen TATOLI/António Dasiparu

DILI, 30 marsu 2022 (TATOLI)–Governu Timor-Leste no Austrália, kuarta ne’e, lansa voo komersiál dahuluk ho aviaun QANTASLINK, ho destinasaun Dili-Austrália bá-mai, ne’ebé sei hahú ho voo dala-tolu kada semana.

Ministru Transporte no Komunikasaun (MTK), José Agustinho da Silva, konsidera ne’e pasu importante ida entre kooperasaun nasaun rua hodi garante konetividade via aérea.

Konferénsia imprensa konjunta iha Aeroportu Comoro, kuarta (30/03). Imajen TATOLI/António Dasiparu

“Loron ne’e istóriku ba Timor-Leste, liliu iha konetividade aérea entre Timor-Leste ho Austrália, prosesu ne’e naruk maibé ikus mai realiza konetividade aérea ba regular flight. Durante ne’e ita-nia konetividade aérea Dili-Austrália uza charter flight, maibé asina ona akordu servisu no ratifika hosi Parlamentu nasaun rua nian, nu’udar baze ba Governu Austrália dezigna sira-nia aviaun QANTAS halo lansamentu voo dahuluk hodi bele asegura konetividade aérea entre Timor-Leste no Austrália, nune’e bele fasilita sidadaun timor-oan ka estranjeiru, hahú ho loron tolu kada semana no sei espande to’o loron lima kada semana, maibé depende ba nesesidade,” Ministru relata liuhosi konferénsia imprensa konjunta iha Aeruportu Internasionál Prezidente Nicolau Lobato, Comoro.

Notísia relevante: Aviaun QANTAS sei garante konetividade aérea Timor-Leste no Austrália

Ministru Trasporte no Komunikasaun, Jose Agustinho da Silva, Embaixadór Austrália iha Timor-Leste, Bill Castello no Xefe Operasionál QANTASLINK, Petrea Bradford no ekipa akompaña lansamentu voo dahuluk aviaun QANTASLINK iha Aeroportu Comoro, kuarta (30/03). Imajen TATOLI/António Dasiparu

Nune’e, governante ne’e espera katak ho pasu ida ne’e ema barak sei vizita Timor-Leste no liña ministeriál sira koopera hamutuk hodi dezenvolve setór turizmu hodi atrai turizta sira mai vizita.

Iha biban hanesan, Xefe Operasionál QANTASLINK, Petrea Bradford, hateten, daudaun ne’e presu billete hahú hosi $236 ho destinasaun Dili-Darwin (ba de’it).

Ministru Trasporte no Komunikasaun, Jose Agustinho da Silva (klaran), Embaixadór Austrália iha Timor-Leste, Bill Castello (karuk) no Xefe Operasionál QANTASLINK, Petrea Bradford (liman los), halo konferénsia imprensa konjunta iha Aeroportu Comoro, kuarta (30/03). Imajen TATOLI/António Dasiparu

“Aviaun ne’e perfeitu tebes hodi semo entre Dili-Austrália. QANTAS kontinua buka oportunidade seluk hodi nune’e iha futuru bele iha rute diferente,” nia dehan.

Aviaun QANTASLINK to’o iha Aeroportu Comoro iha lorokraik tuku 15:15, ne’ebé simu hosi ekipa bombeiru rega bee hasoru, nu’udar sinál hato’o bem-vindu mai Timor-Leste.

Seremónia ne’e partisipa hosi Sekretáriu Estadu Protesaun Sivil, Joaquim Gusmão dos Reis Martins, Vise-Ministru Finansa, António Freitas, inklui Embaixadór Austrália iha Timor-Leste, Bill Castello.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here