Ministru Edukasaun Joventude no Desportu, Armindo Maia. Imajen TATOLI/Francisco Sony

DILI, 30 marsu 2022 (TATOLI)–Ministériu Edukasaun Juventude no Desportu (MEJD) sei fó sai sirkulár ba eskola hotu kona-ba adiantamentu ezame primeiru períodu ba estudante sira iha territóriu nasionál, relasiona ho semana santa inklui Eleisaun Prezidensiál.

Tuir Ministru Edukasaun Juventude no Desportu, Armindo Maia, ezame primeiru períodu iha tinan ne’e deside ona ba fulan-abríl.

“Ha’u fó ona orientasaun ba diretór sira hotu atu adia ezame primeiru períodu ba estudante sira tanba ezame ne’e soke malu ho semana santa inklui loron votasaun nian,” Ministru informa ba jornalista sira, iha Palásiu Governu, kuarta ne’e.

Notísia relevante: MEJD sei introdús kaderneta eskolár foun ba nível ensinu báziku

Tanba ne’e, iha kinta (31/03) MEJD sei hasai sirkulár ba eskola hotu iha territóriu nasionál atu adia prosesu ezame ba estudante sira iha semana ida nia laran, hafoin eventu rua ne’e ramata ona maka hahú fali ezame.

“Baibain kuandu tama ona semana santa ne’e eskola hotu sei feriadu, depois tama tan eleisaun ne’e sei difisil liu, tanba fasilidade eskola balun iha territóriu nasionál sei uza sai fatin sentru votasaun,” nia akresenta.

Maski nune’e, governante ne’e garante katak tempu adiantamentu ba ezame primeiru períodu ne’e la kleur.

“Ezame sei hala’o nafatin iha abríl nia laran maibé loron maka sei fó sai liuhosi sirkulár ne’ebé sei públika iha loron kinta agora,” Ministru tenik.

Tuir kalendáriu, Eleisaun Prezidensiál segunda volta sei realiza iha loron 19 abríl 2022.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here