Primeiru-Ministru, Taur Matan Ruak, prezide reuniaun Konsellu Ministru. iha Palásiu Governu, kuarta (30/03). Imajen TATOLI/Francisco Sony

DILI, 30 marsu 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova Projetu Dekretu-Lei ne’ebé aprezenta hosi Ministru Administrasaun Estatál, Miguel Pereira de Carvalho, kona-ba Fundu Espesiál ba Dezenvolvimentu Ataúro (FEDA).

“Fundu ida-ne’e iha personalidade jurídika, autonomia administrativa, autonomia finanseira alargada no autonomia patrimoniál, ne’ebá mai ho objetivu atu finansia programa no projetu anuál no plurianuál, ho karater sosiu-ekonómiku no ambientalmente sustentável, destina ba dezenvolvimentu territóriu no populasaun munisípiu Ataúro nian,” Ministru Prezidénsia Konsellu Ministru interinu, Rui Augusto Gomes, relata hafoin reuniaun ezekutivu, iha Palásiu Governu, kuarta ne’e.

Notísia relevante: MAE-Autoriedade Komunitária Ataúro diskute futuru instalasaun edifísiu

Enkuantu, FEDA prezide hosi Prezidente Munisípiu Ataúro no tutela husi Primeiru-Ministru, Taur Matan Ruak.

“Parlamentu Nasionál aprova tiha ona lei númeru 1/2022, ne’ebé promulga ona hosi Prezidente Repúblika, ba fundu ne’ebé ho valór millaun $13. Osan ida-ne’e finansia projetu sira ne’ebé liga ho ambiente, turizmu, infraestrutura no seluk tan,” esplika atuál Ministru Finansa ne’e.

Autoridade sentrál estabelese administrasaun munisipál Ataúro ho ninia kompeténsia sira hanesan munisípiu sira seluk, maibé iha kompeténsia adisionál  iha área ambientál no turizmu komunitáriu.

Iha loron 31 maiu 2021, Parlamentu Nasionál aprova Proposta-Lei Divizaun Administrativa Territóriu ho unanimidade, nune’e, Loré no Hatulia B sai postu administrativu foun no Ataúro sai munisípiu foun iha 01 janeiru 2022.

Iha tinan 2022, Governu prevee orsamentu ba Ataúro nu’udar munisípiu foun, ho montante $2.508.100, kompostu hosi saláriu no vensimentu $484.932, bens no servisu $990.797, kapitál menór $728.100, kapitál dezenvolvimentu laiha, no transferénsia públika $304.271.

Iha loron  09 marsu 2022, Governu nomea Domingos Soares hodi asume kargu Administradór munisípiu Ataúro iha rejime komisaun servisu, ba períodu tinan-tolu, sura hosi loron simu pose.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here