Diretór Ezekutivu SASCAS, Duarte Soares Noronha no Prezidente CCLN, Riak Leman, asina akordu implementasaun programa apoiu grupu veteranu, ne’ebé akompaña hosi Primeiru-Ministru, Taur Matan Ruak no Ministru Asuntu Kombatente no Libertasaun Nasionál, Júlio Sarmento da Costa 'Meta Malik', iha salaun PCM, Palásiu Governu, tersa (29/03). Imajen TATOLI/Antónia Gusmão

DILI, 29 marsu 2022 (TATOLI)–Servisu Apoiu Sosiedade Sivil no Auditoria Sosiál (SASCAS, sigla portugés) no Konsellu Kombatente Libertasaun Nasionál (CCLN, sigla portugés), tersa ne’e, asina akordu ba implementasaun programa apoiu grupu veteranu.

“Ha’u hanoin asinatura ne’e pasu ida di’ak loos no ita tenki tau-matan, maibé bainhira haree didi’ak ita kontinua. Ita la halo buat foun, ida-ne’e katak kontinua buat ne’ebé mai dook hosi kotuk,” Primeiru-Ministru (PM), Taur Matan Ruak, hateten hafoin selebra akordu, iha salaun Prezidénsia Konsellu Ministru (PCM, sigla portugés), Palásiu Governu.

Xefe Governu haktuir, momentu nia hanesan Prezidente Repúblika, konsege halo sensibilizasaun ba veteranu sira iha kada munisípiu hodi bele toma inisiativa kria fundu rasik.

“Ita la’ós hanoin de’it ba agora, maibé hanoin ba oan no beioan sira, tanba ne’e munisípiu barak toma inisiativa maibé depois la la’o, só Ainaro de’it no foin daudaun mak replika fali iha nasionál,” nia akresenta.

Notísia relevante: Fundu kontributivu veteranu millaun $20-resin iha konta fundu veteranu

Iha biban hanesan, Koordenadór SASCAS, Filipe da Costa, esplika, programa apoiu organizasaun ka grupu membru CCLN sei implementa hosi SASCAS rasik ho kolaborasaun CCLN, tanba ne’e parte rua presiza iha akordu ruma.

Fundu ba programa ne’e hamutuk $500.000, ne’ebé prevee iha Orsamentu Jerál Estadu (OJE) 2022 hanesan transferénsia públika.

“Ho lansamentu programa ne’e, Servisu Apoiu Sosiedade Sivil no Auditoria Sosiál iha sub programa hamutuk neen, kompostu hosi apoiu organizasaun sosiedade sivil, auditoria sosiál, relijiaun katóliku, relijiaun la’ós katóliku, asosiasaun interelioju ida kona-ba turizmu relajiozu, programa apoiu organizasaun rezisténsia, no ikus liu mak programa apoia grupu Konsellu Kombatente Libertasaun Nasionál,” Koordenadór akresenta.

Enkuantu, programa ne’e ninia alvu loloos maka veteranu sira ne’ebé ho ninia kategoria dedikasaun 0 a 3 no 4 a 7, nune’e programa realiza hafoin diskusaun entre dirijente parte rua iha tinan 2021.

“Asinatura akordu ne’e atu fasilita ami halo sosializasaun programa ne’e hamutuk, selesaun proposta, monitorizasau, avaliasaun no supervizaun hamutuk, ne’ebé programa ne’e sei hala’o iha territóriu tomak no CCLN nível munisípiu mak sei tulun organiza grupu no organizasaun sira, inklui sei halo akompañamentu ba implementasaun atividade kada munisípiu,” nia tenik.

Tuir planu, sei iha projetu ida iha kada munisípiu ida inklui atividade sira hanesan edukasaun ne’ebé bele fó subsídiu ba veteranu dedikasaun 03 no 4 a 7 sira nia oan ba eskola no atividade ekonomia ne’ebé apoiu ba atividade agrikultura, indústria transformasaun ai-han no indústria artezenatu sira, ne’ebé iha proposta laran sei inklui mós fundu ruma ba atividade operasaun.

“Projetu ne’e ninia objetivu mak atu garante asesu edukasaun ba veteranu 03 no 4 a 7 ninia oan-sira no kria oportunidade hetan rendimentu uma-kain ba veteranu 03 no 4 a 7 sira. Daudaun ne’e SASCAS loke ona oportunidade atu submete proposta no loron ikus iha loron 15 abríl 2022,” nia dehan.

Iha fatin hanesan, Prezidente CCLN, Riak Leman, apresia no hato’o parabéns ba inisiativa prepara ona programa ne’e.

“Hafoin funu hotu, balun mak simu osan no barak liu laiha, Ministériu Ensinu Superiór Siénsia no Kultura (MESSK) fó subsídiu eskolár ba liu sira 8 a 14, 15 a 19 sira-nia oan ne’ebé hetan fixa veteranu, sira-nia oan hetan di’ak no sira mós simu osan,” nia preokupa.

Riak Leman mós nota katak, Ministériu Asuntu Kombatente Libertasaun Nasionál (MAKLN) foin daudaun fó bolsa estudu ba veteranu  8 a 18 mártir sira-nia oan, maibé 03 no 4 a 7 la hetan, inklui subsídiu eskolár ba sira ne’ebé simu osan kada fulan.

“Entaun ita haree ba realidade ida-ne’e katak sira 03 no 4 a 7 la simu osan, ita haluha tiha. Veteranu 03 no 4 a 7 mak benefisia osan ne’e, aban bainrua sei tau mós osan ba sira se lae iha diskriminasaun iha veteranu nia laran, tanba veteranu 03 no 4 a 7 mak barak liu,” nia tenik.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here