iklan

HEADLINE, SEGURANSA

Prevene asidente, PNTL sensibiliza Kódigu Estrada ba utulizadór dalan públiku

Prevene asidente, PNTL sensibiliza Kódigu Estrada ba utulizadór dalan públiku

Codigo-da-estrada. Foto/Google.

DILI, 29 marsu 2022 (TATOLI)– Komandu Polisia Nasionál Timor-Leste (PNTL), munisípiu Dili liuhosi Departamentu Tránzitu, tersa ne’e, halo sensibilizasaun Dekretu-Lei númeru 6/2003, 6 abríl kona-ba Kódigu Estrada ba motorista, kondutór, komunidade no eskola oan-sira, nune’e bele konxiente uza dalan públiku hodi prevene asidente tráfegu.

Iha lejizlasaun ne’e previstu ba serbisu PNTL nian hodi implementa lei no kontrola regra kódigu Estrada hodi regula sidadaun sira uza transporte respeita sinál tránzitu sira hodi bele kontribui rédus no minimiza kazu aseidente tráfegu iha kapitál Dili.

“Ita fahe informasaun ba ita nian sidadaun sira ne’ebe la’o ain no mós uza transporte públiku no privadu atu kumpre kódigu Estrada, nune’e ita bele prevene no minimiza asidente tráfegu no bele halakon ema nia vida,” Komandante Polísia Tránzitu Munisípiu Dili, Inspetór Polisia Domingos Gama, hateten ba jornalista sira iha Rotunda Nicolau-Lobato-Comoro, tersa ne’e.


Komandu PNTL, munisípiu Dili liuhosi Departamentu Tránzitu, halo sensibilizasaun Dekretu-Lei númeru 6/2003, 6 abríl kona-ba Kódigu Estrada ba utulizadór dalan públiku. Imajen/ Natalino Costa.

Tanba, Komandante ne’e dehan iha munisípiu Dili kazu asidente tráfegu nia númeru aumenta kada loron, liuliu ba motorizada, karreta no inklui ema ne’ebe la’o ain.

“Sensibilizasaun ne’e ita bele konsensializa ita nia motorista sira sira atu konduz karreta no motor respeita kódigu estrada no ba maluk sira ne’ebe la’o ain, nune’e ita bele prevene asidente tráfegu grave sira,” Inspetór Polisia ne’e espera.

Polisia Tránzitu Dili sei kontinua sensibiliza kódigu Estrada ba sidadaun sira atu kontinua kumpre hodi proteje nia vida no ema seluk nian.

Entretantu, tuir dadus hosi Komandu Polisia Nasionál Timor-Leste (PNTL) Munisípiu Dili, iha fulan-fevereiru 2022, rejista asidente tráfegu hamutuk 87, hosi númeru ne’e ema na’in-tolu mak mate. 

Alende ne’e, Komandu munisípiu Dili mós konsege rekolla reseita ba kofre Estadu hamutuk $24.432.

Reseita ne’e, rekolla hosi operasaun ne’ebé halo liuhosi apreensaun motór 612, hosi númeru ne’e infratór sira konsege selu hotu ona koema hamutuk $24.432.

Polísia Tránzitu deteta maioria infratór sira la lori dokumentu motór nian, la monta espellu, laiha xapa matríkula no laiha karta kondusaun.

Nune’e, Tránzitu Dili kontinua halo operasaun ba motór no karreta tuir politika no orientasaun hosi Komandu Jerál nian.

Enkuantu, iha inísiu fulan-marsu ne’e, PNTL Dili hala’o operasaun ka pasa revista konsege halo apreensaun ba motór 79 no karreta taxi ida ne’ebé kondutór laiha karta kondusaun no laiha xapa mátrikula.

Operasaun pasa revista ba viatura sira ne’e hala’o hosi Komandu PNTL Dili no hetan apoia másimu hosi Unidade Espesiál Polísia (UEP), BOP, UPM no UPF inklui serbisu sekretu sira.

Notísia relevante: Asidente tráfegu hamate ema na’in-12 iha janeiru to’o outubru

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!