Prezidente KFP fo pose ba kargu xefia foun nain haat.Imajen/Tatoli Nelson de Sousa.

DILI, 28 marsu 2022 (TATOLI)-Prezidente Komisaun Funsaun Públika (KFP), Faustino Cardoso, segunda ne’e, fó ona pose ba kargu xefia iha Komisaun Funsaun Públika hamutuk ema na’in haat hodi asume responsabilidade durante mandatu tinan haat hahú husi loron 01 fulan-abril 2022 to’o 2026.

Despaisu ba serimonia tomada pose ne’e baseia ba desizaun númeru 4682/2022/KFP, no konsidera tuir lei númeru 7/2009, 15 jullu, kona-ba kompetensia Komisaun Funsaun Públika hodi halo rekrutamentu, nomeasaun no promosaun iha setór públiku.

Prosesu selesaun tuir méritu konklui iha loron 09 fulan-fevereiru 2022 ne’ebé aprezenta husi ekipa juri hodi nomea Sónia da Silva Soares nu’udar Inspetora KFP, Élio Pereira Guimarães ba Xefe Unidade Peskiza Polítika no Observasaun Funsaun Públika.

Nune’e mós Lidónia Manuel hanesan Xefe Unidade Dezenvolvimentu Sistema Informasaun Funsaun Públika no Lídia Aquelina Imaculada Conceição ba Xefe Unidade Protokolu no Komunikasaun Sosiál.

Prezidente KFP Faustino Cardoso,  husu ba emposadu sira atu la’o tuir prinsipiu erói sira-nian hodi serbí nasaun no povu ho diak liután.

“Parabéns espiritu  foun servisu hamutuk  no hein katak ho estrutura foun bele apoiu implementasaun  prioridade mandatu terseiru KFP nian,” Prezidente KFP ne’e hateten durante ninia diskursu iha salaun KFP, Matadouro.

Posé ba kargu xefia foun ne’e hodi kompleta estrutura KFP nian ba daruak no tuir planu iha tempu badak Prezidente KFP sei fó tan posé ba kargu foun xefia balun tan.

Emposada, Sónia da Silva Soares hateten orgullu ho fiar ne’ebe iha atu asume kargu refere maibé iha responsabilidade bo’ot hodi dezenvolve instituisaun ne’e atu funsiona diak liután durante ninia mandatu.

Jornalista: Nelson de Sousa

Editór: Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here