DILI, 25 marsu 2022 (TATOLI)—Prezidente Kámara Komérsiu no Indústria Timor-Leste (CCI-TL, sigla portugés), Oscar Lima, hateten, posibilidade iha tempu badak Timor-Leste ameasadu enfrenta menus mina-sona tanba nasaun produtór la halo exportasaun.
“Ha’u hanoin durante fulan ida to’o rua mina-sona sei menus iha merkadu tanba nasaun produtór mina la autoriza halo exportasaun, tanba stock iha nasaun exportadór mina mós hahú menus, nune’e kondisaun ne’e afeta ba nasaun hotu inklui Timor-Leste,” Oscar Lima informa iha edifísiu Acait, sesta ne’e.
Notísia relevante: Folin nesesidade bázika sa’e, CCI-TL husu tau-atensaun ba servisu portuáriu
Ba kestaun ne’e, Prezidente CCI-TL ho nia ekipa, hamutuk ho Governu sei esforsu halo negosiasaun ho Embaixada Indonézia iha Timor-Leste, Embaixada Malázia no reprezentante nasaun seluk ne’ebé hanesan nasaun produtór mina-sona, hodi buka solusaun bele hatama mai Timór, maski oituan maibé bele responde nesesidade rai-laran.
Iha biban hanesan Vise-Prezidente CCI-TL ba asuntu Pekenu no Médiu Empreza, Siu Peng Lay, hateten, kondisaun ne’e akontese tanba menus hosi fábrika kedan.
“Ida-ne’e provizóriu sira labele exportasaun lai tanba ema la halo produasaun, mina exportasaun no konsumu lokál iha ema-nia rai de’it. Tuir informasaun sira sei la exporta mina-han tanba hakarak transforma mina hirak ne’e sai kombustível hanesan biodiesel no haree ba mina iha merkadu mundiál ho folin di’ak liu fali doméstiku, entaun Indonézia hanesan sentru produsaun mina ne’e barak liu exporta, nune’e iha doméstiku mina laiha,” nia tenik.
Maski nune’e, tuir informasaun autoridade Indonézia buka hela soluasaun, ne’ebé bainhira iha ona mak situasaun sei normál fali tanba kondisaun hirak ne’e dinámika.
Siu Peng Lay dehan, mina-sona ne’ebé sei menús la’ós ho marka ‘Bimoli’ de’it, maibé ho marka seluk ne’ebé importa hosi nasaun Indonézia.
“Solusaun ne’ebé ita sei foti iha situasaun ne’e mak ita kontaktu ona ho nasaun sira hanesan Malázia no Vietname atu hatama mina mai, maski ho folin sa’e oituan maibé ita tenke hatama nune’e bele konsumu,” nia dehan.
Jornalista : Arminda Fonseca
Editor : Julia Chatarina
