Traballadór sira sona no halo u’ut kafé, iha Manleuana, 16 jullu 2022. Imajen TATOLI/António Gonçalves

DILI, 25 marsu 2022 (TATOLI)–Diresaun Jerál Estatístika (DGE, sigla portugés) hosi Ministériu Finansa (MF) iha loron 19 marsu 2022 públika Timor-Leste nia Produtu Internu Brutu (PIB) la’ós petrolíferu tinan 2021 sa’e ba pozitivu 1,5% ne’ebé kontribui hosi konsumu finál setór privadu no públiku.

“Tendénsia pozitivu balun hosi komponente PIB, kompostu hosi konsumu públiku sa’e ba 6,2%, ne’ebé hetan kontribuisaun hosi aumentu empregu no konsumu bens no servisu, tamba iha aumentu despeza ba fornesimentu materiál operasionál no servisu profisionál relasiona ho COVID-19,” relata nota ne’ebé Agência TATOLI asesu hosi Ministériu Finansa (MF), sesta ne’e.

Notísia relevante: Mudansa tetu orsamentu sei afeta ba PIB no Fundu Petrolíferu

Ligadu ho konsumu privadu sa’e ba 2,5%, kreximentu ne’e mantein ein temu per kapita no bazeia ba apoiu sólidu hosi Governu ba uma-kain, liuhosi transferénsia sasán, subsídiu no reativa atividade ekonómiku uma-kain.

Nune’e exportasaun bens no servisu sa’e ba 26%, ne’ebé kontribui hosi exportasaun kafé sa’e tamba volume produsaun sa’e no stoke akumuladu iha tinan 2020.

Enkuantu, importasaun bens no servisu tun ba 10,5%, importasaun servisu de’it mak tun ba -40,7%. Enkuantu, aumentu iha sasán konsumu ne’ebé importa hosi rai-li’ur sa’e ba 13% ne’ebé konsistente ho konsumu privadu ne’ebé sa’e inklui ho espansaun fronteira internasionál ba nasaun prinsipál ne’ebé sai nudár parseiru komérsiu ba Timor-Leste.

“PIB tinan 2021 (versaun preliminár) ne’e bazeia ba informasaun ikus ne’ebé disponível kona-ba indikadór petrolíferu no la’ós petrolíferu hodi fornese informasaun atuál kona-ba Timor-Leste ninia kresimentu ekonómiku. Ba versaun preliminár, indikadór ne’ebé di’ak liu ba PIB petrolíferu mai hosi parte produsaun no parte despesa ba indikadór PIB la’ós petrolíferu,” nota hosi  MF esplika.

PIB tinan 2021 (versaun finál) sei públika iha setembru 2022, ne’ebé sei hatudu dadus loos liu tamba sei inklui dadus sira hotu, liuliu hosi produsaun nian ka peskiza atividade emprezariál.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here