Fatin lixu provizóriu iha munisípiu Viqueque. Imajen TATOLI/Vitorino Lopes da Costa

VIQUEQUE, 25 marsu 2022 (TATOLI)-Administradór munisípiu Viqueque, Januário Soares ‘Bolly’, hateten, munisípiu Viqueque sei tau prioridade kria fatin lixu iha tinan 2023 tanba durante ne’e laiha fatin lixu própriu.

“Projetu kria fatin lixu ami tau ona iha orsamentu 2022, maibé orsamentu la pasa. Nune’e ami tau fali iha orsamentu 2023 hanesan prioridade ba munisípiu Viqueque, tanba durante ne’e ita haree laiha fatin lixu no komunidade soe lixu arbiru de’it. Ita identifika ona fatin,” Autoridade munisipál ne’e informa ba Agência TATOLI, iha ninia knaar fatin, Administrasaun munisipál, sesta ne’e.

Notísia relevante: Eskola 04 setembru Viqueque aprezenta produtu resiklajen iha komemorasaun Proklamasaun Independénsia

Januário Soares dehan, presiza fatin própriu ba lixu tanba durante ne’e komunidade soe lixu namkari iha villa laran.

“Investidór sira bainhira atu mai halo investimentu ruma iha munisípiu Viqueque, ema sei haree fatin moos ka lae. Agora ita-nia lixu soe arbiru de’it, investidór sira ladún interese atu mai. Tanba ne’e ita presiza estabelese fatin lixu hodi komunidade labele soe lixu arbiru tan,” nia akresenta.

Bazeia ba levantamentu ne’ebé antes ne’e servisu munisipál halo no akumula hotu iha proposta orsamentu Grande Opsaun Planu ba munisípiu Viqueque, propoin millaun $15 ba tinan-lima hodi harii fatin lixu, ne’ebé kada tinan aloka millaun $3.

Aleinde ne’e, munisípiu Viqueque mós halo pedidu ba Institutu Jestaun Ekipamentu, Institutu Públiku (IGE, I.P, sigla portugés) atu loke dalan ba fatin lixu munisípiu Viqueque  iha área Beobe, maibé to’o agora seidauk hetan resposta.

“Fatin ne’ebé ami identifika ona presiza dalan maka foin bele asesu bá,”  Autoridade munisipál tenik.

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here