Polísia Tránzitu munisípiu Bobonaro halo apreensaun ba bís Bís diresaun Dili-Maliana tanba kontra rega roduviária. Imajen Tatoli/Sérgio da Cruz.

BOBONARO, 26 marsu 2022 (TATOLI) – Ekipa Diresaun Transporte Terrestre (DTT) Munisípiu Bobonaro sei koordena ho polísia unidade tránzitu kontrola bís ne’ebé movimenta latuir regra.

Diretór DTT Munisípiu Bobonaro, José Paulo Henriques Baptisita, fó-sai katak, tempu badak ekipa sei kontrola bís diresaun Maliana-Dili ne’ebé tula pasajeiru latuir regra.

Nia ko’alia kestaun ne’e tanba iha segunda semana ne’e polísia seksaun tránzitu munisípiu Bobonaro halo apreensaun ba bís neen iha suku Holsa, postu administrativu Maliana, ne’ebé halo sirkulasaun tenta tula no hatún pasajeiru laiha estasionamentu Tunubibi.

“Loloos ne’e sira tenke tula no hatún iha terminál Tunubibi. Ita planu sei koordena ho polísia tún ba terrenu atubele aplika regra tanba sira viola ona regra tránzitu nian, liuliu haree ba dekretu-lei númeru 02/2003 no dekretu-lei Kódigu Estrada númeru 06/2003,” nia informa ba Agência TATOLI, iha Maliana, sesta ne’e.

Tanba Tuir regra ne’ebé iha katak, bís ne’ebé tula pasajeiru hosi kapitál Dili ba Maliana tenke hatún de’it iha estasionamentu Tunibibi, suku Tapo-memo, postu administrativu Maliana, hafoin pasa ba mikrolete ka transporte espesiál ojek mak sei ba hatún iha Maliana Vila.

Maibé Diretór ne’e observa katak, durante ne’e dalabarak motorista ne’ebé tula pasajeiru sira latuir regra.

“Ita durante ne’e aplika beibeik regra sira-ne’e, maibe ita-nia motorista sira nafatin kontra. Sé ida- ne’e mak beibeik ita sei foti medida hasai sira-nia lisensa kondusaun hosi motorista tanba ne’e ema mak konduz karreta ne’e, entaun nia sei simu konsekuénsia ba asaun ne’ebé nia rasik komete,” nia fó hanoin.

Diretór DTT Munisípiu Bobonaro ne’e rekoñese durante ne’e la monitoriza ho másima  iha terrenu tanba menus rekursu umanu tanba iha de’it funsionáriu permanente na’in-hitu, kontratadu na’in-neen no iha de’it motorizada rua.

Tanba ne’e DTT planeia koordena ho polísia seksaun tránzitu hodi pasa revista ba trasporte públiku hirak-ne’ebé sirkula entre kapitál Dili-Maliana.

Tuir dadus ne’ebé Diresaun Transporte Terestre (DTT) Munisípiu Bobonaro rejista hahú hosi 2020 até agora, auto carro ne’ebé halo operasaun diresaun Dili-Maliana hamutuk 32. Hosi númeru ne’e 28 mak sei ativu hela tula pasajeiru.

Notisia relevante: PNTL Bobonaro halo apreensaun ba Bís neen

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here