Médiku iha Sentru Saúde Vera Cruz halo atendimentu ba labarik sira ho moras dengue, kuarta (09/02). Imajen TATOLI/António Dasiparu

DILI, 24 marsu 2022 (TATOLI)—Tuir dadus estatístika hosi Ministériu Saúde (MS) liuhosi Diresaun Nasionál Saúde Públika liuliu Departamentu Vijilánsia Epidemolojia iha Ministériu Saúde, hahú fulan-janeiru too horisehik pasiente dengue sa’e ba 3.547, hosi númeru ne’e na’in-40 mak mate.

“Situasaun kazu dengue iha Timor-Leste hosi janeiru mai too horiseik hamutuk kazu 3.547 no kumulativu óbitu na’in 40,” refere nota ne’ebé Agência TATOLI asesu, sesta ne’e.

Maioria kazu ne’e deteta husi Munisípiu Dili ho totál 2.350 Baucau 221, Manatuto 164, Covalima 121, Ermera ho kazu 90, Manufahi 147 Viqueque 57, Ainaro 43, Liquiça 101, Aileu 8, Bobonaro 43 Lautem 121 no RAEOA haat.

Munisípiu Dili nafatin rejista kazu ne’ebe a’as iha semana dahuluk too semana da-sanolu fulan marsu 2022 ho totál kazu 2.350.

To’o ohin loron desimu primeiru semana fulan marsu 2022, kazu dengue hosi postu administrativu Dom Alexo iha 1318, Cristo-Rei 410, Vera-Cruz 262 no Nain-Feto 308.

Fasilidade Saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 408, Klínika Fatumeta 239, Sentru Saúde Comoro 787, Sentru Saúde Vera-Cruz 191, Sentru Saúde Formoza 384, Sentru Saúde Becora 234, Klínika Madre Eliza ida, Sentru Saúde Atauro 11, Sentru Saúde Metinaro 33, Klínika Bairru-Pité 59 no Klínika Motael na’in-rua no Klínika Moris Foun na’in-ida.

Nune’e, Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka senti laran sa’e,liman-ain no sikun moras hodi bele hetan atendimentu husi profisionál saúde sira.

Apela mós Autoridade Munisipál no Autoridade Lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dal aida.

Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin.

Notísia relevante:   Dengue hamate labarik na’in-39 iha Timor-Leste

Jornalista : Felicidade Ximene

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here