DILI, 24 marsu 2022 (TATOLI)—Prezidente Repúblika, Francisco Guterres Lú Olo, apresia servisu Polísia Nasionál Timor-Leste (PNTL), hodi asegura seguransa iha ámbitu eleisaun prezidensiál hahú hosi kampaña eleitorál to’o eleisaun ramata.
“Mensajen hosi Prezidente Repúblika nian transmite apresia ba PNTL tomak nia servisu ne’ebé hahú hosi kampaña eleitorál to’o eleisaun ramata. Prezidente Repúblika husu mantein ho ida ne’e no situasaun sira-ne’ebé krime kontra lei kontinua atentu hodi prosesa,” Komandante Jerál PNTL, Komisáriu Faustino da Costa, hateten ba jornalista sira hafoin ramata enkontru semenál ho Xefe Estadu iha Palásiu Prezidensiál Nicolau Lobato, Bairru Pite, Dili, kinta ne’e.
Xefe Estadu mós husu PNTL atu asegura seguransa bainhira iha eleisaun prezidensiál segunda volta.
Biban ne’e, Komisáriu atualiza saida mak PNTL sei halo ba iha eleisaun prezidensiál segunda volta nian no aprezenta saida mak PNTL hala’o iha fulan-marsu ne’e, katak situasaun seguransa iha territóriu nasionál la’o di’ak no seguru.
“PNTL preparadu asegura seguransa bainhira iha eleisaun prezidensiál segunda volta,” nia hateten.
Iha eleisaun prezidensiál rejista kazu krime eleitorál iha Dili de’it 20-resin maibé ba nivel nasionál hosi munisípiu hotu hosi kampaña eleitorál to’o eleisaun, rejista mós kazu lubuk ida. Prosesu kazu sira-ne’e rejista ona iha Ministéiru Públiku nu’udar na’in ba asaun penál hodi loké prosesu tuir mai.
Jornalista : Nelson de Sousa
Editór : Cancio Ximenes
