Sarjentu Moises Kelu, nu’udar Polísia Nasionál Timor-Leste (PNTL) iha RAEOA. Imajen espesiál.

OÉ-CUSSE, 24 marsu 2022 (TATOLI) – Sarjentu Moises Kelu, nu’udar Polísia Nasionál Timor-Leste (PNTL) ne’ebé hala’o serbisu iha Rejiaun Administrativa Espesiál Oé-Cusse Ambeno (RAEOA) kinta ne’e hakotu iis iha Hospitál Referál Oé-Cusse (HRO) tanba sofre moras komplikadu.

Komandante PNTL RAEOA, Superindendete Xefe, Mateus Assunção Mendes, informa, institusaun PNTL iha RAEOA, lakon nia membru di’ak ida, matebian sarjentu, Moises Kelu, tanba matebian integra-an iha instituisaun PNTL hahú kedas 2001 presta serbisu iha unidade tránzitu to’o hakotu iha eskuadra Pante Makasar.

“Matebian nu’udar elementu ida disiplina, tanba instituisaun PNTL ezije membru hotu atu hatudu disiplina no loialidade, komandu sente lakon nia membru di’ak ida, matebian nia dedikasaun tomak komesa integra-an iha instituisaun PNTL iha ukun-an to’o agora, servisu hanesan tránzitu iha rejiaun ne’e,” Mateus Assunção Mendes, informa ba Agência Tatoli, iha Kuartél PNTL Oé-Cusse, kinta ne’e.

Família matebian, José Kelu, hanesan alin hosi matebian, hatete, matebian hala’o tratamentu iha Hospitál Nasionál Guido Valadares (HNGV) desde dezembru 2021 to’o marsu 2022, matebian transporta hodi halo tratamentu iha Hospitál Referál Oé-Cusse.

“Maun mai halo tratamentu durante loron lima iha ospitál, maibé planu Maromak nian, ita tenke simu, no ha’u-nia maun hakotu iis iha ospitál,” José Kelu haktuir.

Diretóra Klínika Hospitál Referál Oé-Cusse, Agnes Bene Bana, hatete, matebian halo tratamentu iha hospitál Oé-Cusse durante loron lima (5), desde semana kotuk, maibé matebian sofre moras komplikadu.

“Matebiannia baixa iha 19 marsu, durante loron lima iha Hospitál Referál Oé-Cusde, ho kondisaun grave, no ho komplikasaun moras seluk, to’o ohin madrugada matebian hakotu iis iha tuku 3:00 ho diagnosa, hemoragia, cerebral, tumor abdominal no tuberculosis pulmonar,” nia katak.

Biografia

Saudozu Sarjentu Moises Kelu, moris iha suku Ban-Afi, sub-rejiaun Nítibe, iha loron 24 fevereiru 1962, nu’udar oan dahuluk hosi maun alin na’in-neen (6), hosi fuan domin, Cipriano Sufa (falesidu) no Blandina Tolo (falesida).

Iha tinan 1991 matebian hahú nia estudu iha eskola primária SDN-1 iha Pante Makasar no remata iha 1997.

Esperiénsia serbisu

Iha 24 jullu 1990 to’o 1999, matebian nu’udar Polísia Nasionál Repúblika Indonesia (POLRI) no 26 fevreiru 2001 kontinua serbisu iha Polísia Nasionál Timor-Leste (PNTL), ne’ebé hahú formasaun dahuluk ba PNTL iha turma hitu ho númeru ID 10985, no matebian envolve mós kursu bázika to’o 27 juñu 2001 matebian halo graduasaun iha sentru formasaun polísia Comoro, Dili.

Nune’e iha 1 agostu 2001, matebian hahú estájiu iha komandu PNTL distritál Oé-Cusse, hodi hetan orden kolokasaun ba sesaun tránzitu, to’o 27 marsu 2006, matebian hetan medalla Komandu Operasaun Konjunta.

To’o iha 27 marsu 2010, matebian hetan promosaun diviza hosi ajente ba ajente prinsipál, to’o 27 marsu 2016 matebian hetan promosaun deviza hosi ajente prinsipál ba ajente xefe, no hetan louvor komportamentu ezemplár.

Iha 1 fevereiru 2018, matebian hetan orden transferénsia hosi sesaun tranzitu ba esquadra Pante Makasar, to’o loron 24 marsu 2022 oras tuku 02:00, matebian hakotu iis iha Hospitál Refererál Oé-Cusse (HRO) hodi husik hela oan-ki’ak na’in-rua, feto ida no mane ida, nune’e, iha 24 marsu 2022 hanesan loron ikus nia peregrinasaun iha mundu, matebian hetan promosaun esepsionál hosi diviza ajente xefe ba sarjentu.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here