Tékniku Komisaun Nasionál Eleisaun (CNE, sigla portugés) hatudu votu nulu ba fiskál partidu sira bainhira hala’o apuramentu nasionál iha salaun CNE, kuarta (23/03). Imajen Tatoli/Francisco Sony.

DILI, 24 marsu 2022 (TATOLI)—Prezidente Komisaun Nasionál Eleisaun (CNE-sigla portugés), José Agostinho da Costa Belo, hateten CNE bolu ekipa susesu kandidatu Prezidente Repúblika períodu 2022-2027 sira hotu atu konfirma hodi prolonga oras ba apuramentu nasionál.

Nia hateten, razaun tanba ohin loron ikus ba apuramentu nasionál ba buletin votu sira hosi Munisípiu no CNE foin mak konklui munisípiu Aileu, Ainaro, Bononaro, Baucau, Covalima no Dili sei iha prosesu apuramentu hela.

“Tanba tuir legalamente ba CNE termina iha oras 72 maibé haree ba realidade no servisu nune’e ohin ami komunika no halo pedidu ba parte aas liu, ne’eduni nia mak iha poder atu deside oinsá para prolonga tan tempu atu nune’e bele finaliza apuramentu nasionál,” Prezidente CNE ne’e hateten ba jornalista sira iha salaun CNE, hafoin hasoru malu ekipa susesu kandidatu hotu-hotu, iha Colmera, Dili, kinta ne’e.

Nia husu tempu atu prolonga apuramentu nasionál ne’e to’o loron 27 marsu hanesan ne’e, nune;e bele konklui hodi bele submete ba Tribunál Rekursu no Trbunál Rekursu hato’o nia rezultadu válida.

Entretantu Ekipa Susesu Kandidatu Prezidente Repúblika José Ramos Horta, Tomas Cabral, hateten CNE bolu ekipa susesu hotu mai atu hadi’a prosesu apuramentu nasionál.

“Ohin bolu ami mai atu husu hadi’a prosesu ne’e atu konfirma hodi husu ba Tribunál Rekursu estende tan tempu hodi bele verifika votu nulu sira-ne’e, tanba munisípu Aileu, Ainaro no Covalima iha mudansa tebes,” nia dehan.

Nia husu ba CNE tanba CNE nia papel importante atu superviziona STAE nia servisu liu-liu emprime buletin votu haruka sasán sentivu no non sensitivu ba munisípiu liu-liu prezidente sentru votasaun sira.

“Ami informa ona ba STAE katak STAE nia emar sira iha sentru balun lakohi fó akta, ne’e sala tanba lei dehan fiskál, kandidatu tenke hetan akta. Ida-ne’e husu ona atu evaluasaun ba STAE para iha segunda volta iha obrigasaun fó akta, se la fó akta ne’e razaun saida,” nia dehan.

Ba preokuasaun hosi ekipa susesu Kandidatu Jose Ramos Horta nian ne’e, Prezidente CNE hateten, CNE nia superviziona teknikamente la’ós fatin hotu-hotu hanesan ne’e iha fatin balun de’it.

“Maibé kapasidade ita-nia brigada sira mak nune’e maibé preokupasaun hirak-ne’e ita rejista hela no ita presiza hadi’a tanba laiha eleisaun ida-ne’ebé mak la’o di’ak hotu kedas,” nia hatán.

Maibé, nia dehan, ida-ne’e la’ós fraude ruma no kestaun sei hadi’a iha preparasaun, formasaun ne’ebé mak di’ak.

Nia dehan, kestaun ne’e la’ós ba órgaun eleitorál mós maibé kandidatu sira mós oinsá hanorin nia militante atu apoiu ho loos duni ba nia kandidatu maibé la’ós ba hakerek fali iha buletin votu laran.

“Ida-ne’e nia intensaun loos hela maibé ami labele konsidera,” José hateten.

Jornalista : Osória Maruqes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here