Negosiante na’in-35 hala’o hikas atividade negósiu iha Merkadu Manleuana. Imajen Tatoli/Nelia Fernandes.

DILI, 24 marsu 2022 (TATOLI)—Governu, liuhosi Autoridade Munisípiu Dili (AMD) daudaun ne’e autoriza hikas vendedór na’in-35 hala’o atividade negósiu iha merkadu Manleuana, hafoin hetan insendiu iha loron 14 fulan fevereiru 2022.

Notísia Relevante: Ekipa konjunta halo limpeza jerál hafoin ahi han merkadu Manleuana

“Tanba nesesesidade ekonomika, ami liuhosi Jestaun Merkadu Manleuana autoriza sira (vítima insendiu merkadu Manleuana) faan provizóriu iha ne’ebá, maibé ho kritériu katak bainhira fatin ne’e halo reabilitasaun sira prontu atu sai hosi ne’ebá. Ida-ne’e, iha mós deklarasaun konjunta ida ho ita-nia jestaun merkadu Manleuana atu sira deklara katak, bainhira Autoridade Munisípiu Dili halo konstrusaun sira prontu kolabora no kontribui hodi realiza konstrusaun ne’e,” Xefe Departamentu Jestaun no Merkadu, Arthur Henriques, hateten ba Agéncia Tatoli, via telefónika, kinta ne’e.

Hafoin akontese insendiu iha merkadu Manleuana iha 14 fulan-fevereiru 2022, Autoridade Munisípiu Dili mobiliza kedas membru jestaun merkadu konjuntu ho ekipa jestaun merkadu Manleuana halo intervensaun hodi halo limpeza iha fatin refere.

Ekipa konjunta halo limpeza jerál hafoin ahi han kisoke 35 iha merkadu Manleuana, Dili. Imajen Tatoli/Nelia Fernandes.

“Hosi ne’e, ami halo levantamentu dadus ba insendiu ne’e iha vítima hamutuk na’in-35, depois iha levantamentu dadús ne’e ami konvoka reuniaun konjunta entre Ministériál hanesan Ministériu Komérsiu Turizmu no Indústria hamutuk ho Autoridade Munisípiu Dili ho Sekretária Protesaun Sívil, ami hamutuk halo enkontru ida ho vendedór sira-ne’ebé vítima ba insendiu ne’e. Hafoin enkontru ne’e ami hato’o orientasaun ba sira, ikus mai iha duni konsensu katak sira prontu atu hein desizaun ida-ne’ebé mai hosi Governu, liu-liu hosi Autoridade Munisípiu Dili,” nia dehan.

Ho kompetensia ne’e, Autoridade Munisípiu Dili forma ekipa tékniku ida hodi ba hala’o leventamentu tékniku iha terrenu, identifika katak presiza muda maibé tenke ho orsamentu nune’e bele atende hotu nesesidade ne’ebé mak sira presiza, liu-liu iha área insendiu nian.

“Tan ne’e, Autoridade Munisípiu Dili prepara ona dezeñu Planta no Kadernu Enkargu (Bill of Quantity; BoQ) no orsamentu aprezenta ona ba Ministru Administrasaun Estatál, hosi ne’e hetan aprovasaun no haruka ona ba Ministériu Finansa, ne’ebé prosesu ne’e ami hein de’it rezultadu ba prosesu reabiltasaun ne’e bainhira mak ita bele realiza,” nia dehan.

Vendedora obralan no vítima ba insendiu iha merkadu Manleuana, Tereza Albertina dos Reis, hateten Governu liuhosi Autoridade Munisípiu Dili seidauk fó autorizasaun ba sira atu hala’o fila-fali atividade negósiu, maibé tanba nesesidade uma laran obriga mak sira faan fila-fali.

“Ami-nia sasán ahi-han mutuk hotu, ami loron kalan han saida. Entaun pasiénsia ami tenke mai faan fila-fali hodi buka netik osan uitoan ba ami-nia moris. Maibé bainhira Autoridade Munisípiu Dili mai dehan atu hadi’a fali ami-nia fatin, ami prontu hasai ami-nia sasaá,” nia dehan.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here