Unidade Implementasaun Akademia (UIA) hala’o atividade formasaun dansa, múzika no árte vizuál ba estudante eskola Palaban, Oé-Cusse. Imajen/Espesiál.

DILI, 23 marsu 2022 (TATOLI)—Governu liuhosi Sekretária Estadu Arte no Kultura (SEAK) realiza kampaña nasionál “Kultura Forte Nasaun Metin” durante loron ida (1) iha Rejiaun Administrativa Espesiál Oé-Cusse Ambeno (RAEOA).

“Ohin, ami organiza atividade kampaña nasionál “Kultura Forte Nasaun Metin” iha Oé-Cusse, área Pante Makasar, atu aban ami hahú atividade hodi ko’alia kona-bá kultura orijinál iha Oé-Cusse, ne’ebé ami konvida lia-na’in sira hosi Pante Makasar atu mai hato’o sira-nia kuñesimentu kona-ba ema orijin Oé-Cusse no kultura ne’ebé mak iha Oé-Cusse,” Diretór Jerál Interinu, João Fátima da Cruz, informa ba Ajénsia Tatoli, via telefónika, kuarta ne’e.

Objetivu hosi atividade kampaña nasionál “Kultura Forte Nasaun Metin” ne’e atu hametin kultura iha munisípiu Oé-Cusse.

Tópiku tolu ne’ebé sei ko’alia iha kampaña nasionál ne’e kona-bá istória no lenda orijinál komunidade Pantai Makasar iha Oé-Cusse no orijin lian Dawan iha Oé-Cusse, mak sei aprezenta iha kolókiu ne’e.

Aleinde atividade kampaña nasionál “Kultura Forte Nasaun Metin”, SEAK liuhosi Dirasaun Unidade Implementasaun Akademia (UIA) fó mós formasaun kona-ba múzika no arte plástika ba estudante sekundáriu sira iha Palaban.

“Nune’e, formasaun ne’e, UIA hala’o komesa ona horiseik no ohin ba loron daruak, nune’e aban ba loron ikus, entaun formasaun ne’e hala’o durante loron tolu ba ita-nia oan sira iha Palaban,” nia informa.

Koordenadór Jerál Unidade Implementasaun Akademia (UIA), Joao António Soares, hateten atividade formasaun hosi UIA dahuluk bazea ba kronograma primeiru trimestre ne’ebé mak realiza iha Oé-Cusse ba formasaun iha área tolu (3), hanesan dansa, múzika no árte vizuál.

“Objetivu hosi formasaun ne’e, oinsá mak atu hakle’an liután ba ita-nia alin estudante sira atu kuñese saida mak arte iha sira-nia estudu,” nia dehan.

Materia prinsipál iha formasaun ne’e sei fó hosi formadór na’in-tolu (3) hosi Dirasaun UIA ni’an, mak formadór hosi Arte Vizuál, múzika no dansa.

“Entaun, materia ne’e sira mak prepara tuir área ne’ebé sira hetan estudu iha tempu ne’ebá hodi fahe fila-fali ba ita-nia alin sira. Nune’e, iha formasaun ne’e sira fó teoria uitoan no prátika mak barak,” nia dehan.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here