Kandidatu Prezidente Repúblika períodu 2022-2027. Imajen/Espesiál.

DILI, 23 marsu 2022 (TATOLI)--Prezidente Komisaun Nasionál Eleisaun (CNE-sigla portugés), José Agostinho da Costa Belo, hateten kandidatu Prezidente Repúblika (PR) na’in-16 sei simu subvensaun $4 ba kada votu.

“Akordu ho dekretu-lei katak kada kandidatu PR ba simu $4 ba kada votu. Kandidatu hotu-hotu iha direitu ne’ebé hanesan no ha’u seidauk bele adianta kona-ba eleisaun segunda volta nian no kandidatu hotu-hotu sei simu tuir lei haruka,” José Belo, hateten iha konferénsia imprensa, Colmera, Dili, kuarta ne’e.

Tuir nia, tratamentu ba kandidatu PR hotu-hotu hanesan, tanba lei define atu atinje to’o númeru votante (5.000) no lei seidauk muda.

“Ha’u hanoin ho lei ne’ebé iha katak ita halo tratamentu ne’ebé hanesan ba kandidatu hotu-hotu, no iha ne’ebá nia la define atu atinje to’o númeru votante sira hira (5.000). Lei seidauk iha mudansa,” José Belo hateten.

Dekretu-lei númeru 6/2018, 14 marsu, kona-ba fixa valór subvensaun hosi Estadu ba kandidatu Prezidénsia Repúblika ba kampaña eleitorál, iha artigu 2 kona-ba ‘valór subvensaun’, iha pontu 1 hateten kada kandidatu prezensiál iha direitu atu simu subvensaun Estadu, ba kampaña eleitorál ho valór $4 ba kada votu ne’ebé hetan.

Iha pontu 2 haktuir, kálkulu valór totál subvensaun ne’ebé Estadu fó ba kada kandidatu prezensiál, bazea ba númeru totál votu ne’ebé hetan, sei realiza ho baze ba akordaun judisiál válida ba votasaun dahuluk no proklama rezultadu eleitorál iha termu nú. 1 artigu 48 Lei nú. 7/2006, 28 dezembru, bazea ba redasaun Lei nú. 4/2017, 23 fevereiru.

Iha artigu 3 iha dekretu-lei hanesan, kona-ba ‘pagamentu subvensaun’, valór subvensaun ne’ebé previstu iha artigu anteriór, sei selu ba kada kandidatu prezensiál to’o loron 30 hafoin publikasaun Jornál Repúblika, bazea ba akordaun judisiál hosi artigu anteriór.

Kandidatu Prezidente Repúblika períodu 2022-2027 ne’ebé atu simu subvensaun hosi Estadu mak hanesan Isabel da Costa Ferreira, Francisco Guterres Lu Olo, Armanda Berta dos Santos, Lere Anan Timur, Mariano Assanami Sabino Lopes, Anacleto Bento Ferreira.

Kandidatu Prezidente PR Martinho da Silva Gusmão, Hermes da Rosa Correia Barros, Maria Helena Lopes de Jesu ‘Milena’ Pires, Felizberto Araújo Duarte, Constâncio da Conceiao Pinto, Rogeiro Tiago Lobato, Virgílio da Silva Guterres, Antero Benedito no Maria Ângela Freitas da Silva.

Bazea ba rezultadu ikus ne’ebé Sekretariadu Tékniku Administrasaun Eleitorál (STAE) fó sai, Kandidatu Prezidente Repúblika (PR) hosi CNRT Jose Ramos Horta hetan votu 301,481 (46,58%), kandidatu PR hosi FRETILIN Francisco Guterres “Lu-Olo” hetan votu 143,408 (22,16%).

Kandidata hosi KHUNTO Armanda Berta dos Santos hetan votu 56,289 (8,70 %), kandidatu independente Lere Anan Timur hetan votus 48,959 votu (7,57%), kandidatu hosi PD Mariano Assanami Sabino hetan 47,008 votus (7,57%), kandidatu hosi PDRT Anacleto Bento Fereeira hetan 13,059 (2,02 %).

Kandidatu independente Martinho da Silva Gusmao hetan votu 8,485 (1,31%), kandidatu independente Hermes da Rosa Correia Barros hetan votu 7,58 (1,23%), kandidata indendente Milena Pires hetan votu 5,335 (0,082%), kandidata independente Isabel da Costa Ferreira hetan votu 4,165 (0,64%).

Kandidatu independente Felizberto Araújo Duarte hetan votu 2,615 (0,40 %) Constancio Pinto hetan votus 2,474 (0,38%), kandidatu independente Rogerio Tiago Lobato hetan votu 2,028 (0,31%), kandidatu independente Virgílio da Silva Guterres hetan votu 1,685 (0,26%), kandidatu independente Antero Benedito hetan votu 1,531 (0,24 %) no kandidata independente Ángela Freitas hetan votu 692 (0,11%).

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here