Prezidente Repúblika, Francisco Guterres Lú olo hasai foto hamutuk no fó pose membrus nain haat viii governu konstitusional iha Palásiu Prezidente Nicolau Lobato, Bairru Pite, Dili, tersa, (22/03). Imajen Tatoli /Egas Cristovão

DILI, 22 marsu 2022 (TATOLI)–Prezidente Repúblika, Francisco Guterres Lú Olo, hateten substituisaun menbru VIII Governu konstituisionál na’in-haat (4) sei hadi’a dezempeñu governamentál.

Membru Governu na’in-haat ne’e mak hanesan Ministru Obra Públika (MOP) Abel Pires da Silva, Ministru Justisa (MJ) Tiago Amaral Sarmento, Vise Ministru Finansa António Freitas, Sekretáriu Estadu ba Assuntu Kombatente Libertasaun Nasionál (SEAKLN) Júlio da Conceição ‘Loro Messak, tersa (22/03) ne’e, hala’o aktu juramentu no asina termu pose ho Xefe Estadu.

“Haree ba tempu badak sei resin hela too mandatu hotu iha tinan 2023 hein katak substituisaun ida ne’e ba membru oitavu Governu konstituisional sei lori benefísiu efetivu no hadiak duni dezempeñu governamentál, iha área sira neebé halo mudansa,” Xefe Estadu, hateten iha nia diskursu bainhira fó pose ba menbru VIII Governu konstituisional na’in-haat (4), iha Palásiu Prezidensiál Nicolau Lobato, Bairru Pite.

Xefe Estadu hato’o votu dezempeñu no rezultadu ne’ebé di’ak tebes ba emposadu servi Estadu no povu.

Mandatu Governu ida-ne’e nian tama ona iha tinan ikus, nune’e emposadu hatene oinsá hatutan buat di’ak ne ebé ninia antesesór halo ona no hatene uza rekursu, no meiu ne ebé nia iha ho matenek kreatividade rigór atu ajuda VIII Governu Konstitusionál luta ba halo di’ak povu nia moris.

Iha vida no funsionamentu kualker Governu ida-nian, proposta hosi Primeiru-Ministru atu substitui membru Governu hanesan hahalok normál ida.

Substituisaun idane’e halo ba nesesidade pontuál sira-ne’ebé define hosi Primeiru-Ministru no Governu Konstitusionál ida-nee atu hasa’e efikásia asaun ezekutivu nian to’o ninia mandatu ramata.

“Ha’u hein katak halo ida-ne’e atu konsege hala’o  polítika no programa hatuur ona ba área justisa , obra públika, finansa nomós asuntu kombatente libertasaun nasionál,” nia hateten.

Enkuantu, PR liuhusi dekretu Prezidente Repúblika nomea membru VIII Governu na’in-haat uza nia kompeténsia konstitusionál tuir artigu 106 númeru 2 halo nomeasaun ba membru Governu bazea ba proposta hosi Primeiru Ministru.

Tuir  artigu 86 alinea h) Konstituisaun Repúblika Demokrátika Timor-Leste hateten katak Prezidente Repúblika  mak iha kompeténsia atu nomeia, fó pose no ezonera membru Governu, tuir proposta husi Primeiru Ministru.

Molok halo nomeasaun ba membru Governu na’in-haat, tuir proposta hosi Primeiru Ministru, Prezidente Repúblika liuhosi Dekretu Prezidente Repúblika ezonera Ministru Obra Públika (MOP) Salvador Eugénio Soares dos Reis Pires, Ministru Justisa Manuel Cárceres da Costa, Vise-Ministra Finansa Sara Lobo Brites no Sekretáriu Estadu ba Assuntu Kombatente Libertasaun Nasionál Gil da Costa Monteiro ‘Oan Soru’.

Ema-ne’ebé partisipa iha serimónia pose ne’e mak hosi Primeiru-Ministru Taur Matan Ruak, membru VIII Governu, Prezidente Tribunál Rekursu, Vise Prezidente Parlamentu Nasionál, Sekretáriu Jerál Partidu Fretilin Mari Alkatiri, Konselleiru másimu partidu KHUNTO José dos Santos Naimori Bukar no konvidadu sira seluk.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here