Bebé ne'ebé ema deskoñesidu soe iha suku Sagadate, postu administrativu Laga, munisípiu Baucau. Imajen espesiál.

BAUCAU, 22 marsu 2022 (TATOLI) – Bebé mane ida ema deskoñesidu soe iha postu administrativu Laga, suku Sagadate, daudaun ne’e asegura ona iha Psychosocial Recovery and Development in East Timor  (PRADET) Baucau.

Responsável fatin hakmatek PRADET Baucau, Joana da Costa, esplika bebé mane ne’e hanaran Milagrios Soares tanba iha signifika ho grasa Maromak nian iha ema bele hetan bebé ne’e ho kondisaun di’ak.

Milagrios asegura hela iha PRADET Baucau inklui ho família ne’ebe hetan atu halo kuidadu bebé nia kondisaun.

“Ami asegura bebé ne’e tanba uma hakmatek PRADET nia misaun serbisu atu halo protesaun ba labarik sira-ne’ebé mak mai ho problema ema soe bebé,” Responsável PRADET Baucau hateten iha Vila Antiga, tersa ne’e.

Durante prosesu kuida hahú hosi inísiu to’o hein dezisaun tribunál deside ema hili bebé mak direitu atu hakiak ka entrega fila ba nia inan hahoris bainhira deteta ona.

PRADET Baucau kondena maka’as aktu irresponsabilidade hosi inan tanba ne’e husu parte kompetente sira atu kontinua buka-tuir individu ne’ebe lakohi responsabiliza labarik ne’e.

Joana hateten, kazu soe bebé iha Timor akontese bebeik ona maibé iha munisípiu Baucau foin ba dahuluk nune’e presza tau atensaun hosi parte hotu inklui inan aman sira.

“Hakarak intensaun halo relasaun ho kolega mane maibé depois hetan tiha rezultadu, maibé la perparadu, ikus mai soe bebé ne’ebé moris mak sai vítima, ha’u husu ba parte relevante inklui inan-aman tau atensaun ba hahalok ida hanesan ne’e,” Joana akresenta.

Pesoál ne’ebé hetan bebé Milagrio Soares sente kontente tanba durante tinan-lima harii família seidauk hetan oan nune’e konsidera bebé ne’ebé nia ho kaben hetan hanesan grasa Maromak nian.

Tuir kronolojia, família refere hetan bebé iha loron segunda, loron 21 fulan-marsu purvolta tuku 06:00 dadersan bainhira MSP (la’en-kaben) hamutuk ho ajudante lori sai karreta atu ba tula rai-henek maibé bainhira atu arranka rona bebé tanis no direitamente hato’o ba autoridade lokál, Ofisiál Polísia Suku (OPS) hodi deside transporta ba postu saúde Sagadate no kontinua transporta ba Hospital Rejional Eduardo Ximenes (HoREX) Baucau no ikus asegura iha PRADET Baucau.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here