Kandidatura Prezidente Repúblika periudu 2022-2027, Tito da Costa Cristovão "Lere Anan Timur". Imajen Tatoli/Francisco Sony

DILI, 22 marsu 2022 (TATOLI)—Kandidatu Prezidente Repúblika períodu 2022-2027 ho númeru sorteiu ualu (8), Lere Anan Timur, liuhosi portavóz ekipa susesu Flávio Simões kongratula kandidadu PR hotu ne’ebé partisipa iha prosesu demokrátiku eleisaun prezidensiál  2022 liu-liu kandidatu PR José Ramos Horta no Francisco Guterres Lú Olo ne’ebé atu hakat ba segunda volta.

Notísia Relevante: Lere Anan Timur apela apoiante simu rezultadu eleisaun

Portavoz ne’e hateten, Jenerál Reformadu Lere Anan Timur nia posizaun polítika atu apoiu entre kandidatu PR Ramos Horta no Lú Olo bainhira akontese eleisaun segundu volta ne’e, kandidatu PR Lere sei hanoin hela atu foti desizaun tanba sei hela desizaun finál hosi Tribunál Rekursu no hein katak Lere sei foti desizaun tuir povu nia interese.

Portavós ekipa susesu kandidatu prezidente períodu 2022-2027, Lere Anan Timur, halo komferénsia imprensa hodi kongratula ba povu nia konfiansa iha eleisaun 19 marsu 2022, ne’ebé hala’o iha Pantai Kelapa Dili, tersa (22/03). Imajen Tatoli/Antonio Dasiparu.

“Agora ita iha tempu balun hodi hein to’o desizaun finál hosi Tribunál Rekursu. Mezmu nune’e Jenerál Remorfadu lere kontinua halo nia observasaun polítika, sei foti tempu balun atu bele hanoin molok deside. Nune’e husu apoiante no simpatizante kalma hodi hein. Maske daudaun ne’e iha ona komunikasaun polítika ho líder balun hosi kandidatu mais votadu rua ne’e, maibé Lere sei foti dezisaun la’ós interese polítika maibé ba povu nia interese,” Portavóz Flávio Simões hateten ba jornalista sira liu konferénsia imprensa iha sede nasionál Pantai Kelapa, tersa ne’e.

Nune’e mós. Nia klarifika informasaun ne’ebé espalla iha públiku katak Jenerál Reformadu Lere taka odamatan ba Sekretáriu Jerál Partidu FRETILIN Mari Alkatiri ne’e la loos tanba iha biban ne’e Jenerál reformadu ne’e hala’o hela atividade iha fatin seluk.

“Hakarak halo klarifikasaun uitoan de’it kona-ba sirkunstánsia vizita surpreza horisehik Marí Alkatiri vizita Jenerál iha Faról, mezmu depois sai tiha konfuzaun iha públiku katak Jenerál taka odamatan tanba Jenerál lakohi simu maibé ida-né la’ós kondisaun real saida mak akontese. Ida-ne’e la loos,” nai dehan.

Nia husu midía sira atu labele fiar lia anin no buka konfirma ho parte ekipa kandidatu Lere atu hetan verasidade informasaun antes fó sai informasaun ho loloos no momoos ba públiku.

“Jenerál Lere ema ida nakloke ba ema hotu tan ne’e hanoin halo klareza tiha situasaun ida-ne’e no maluk mídia sira hakerek buat ruma sala karik halo loos tiha tanba iha obrigasaun kontribui ba situasaun di’ak, amigavel ba ita-nia katuas sira iha relasaun di’ak ba malu nafatin,” nia hateten.

Ekipa susesu hosi kandidadu Prezidente Repúblika ba períodu 2022-2027 ho númeru sorteiu 8, Lere Anan Timur, agradese ba apoiu hosi apoiante no simpatizante, organizasaun masa rezisténsia, veteranu ho povu tomak ba susesu hotu ne’ebé ekipa hetan no povu emjerál kontribui eleisaun la’o di’ak ho hakmatek ba ezerse direitu síviku.

Lere Anan Timur mós kongratula órgaun eleitorál CNE no STAE mezmu hasoru dezafiu barak konsege organiza eleisaun prezidensiál jeralmente lao di’ak no autoridade seguransa ho militár ne’ebé apoiu bele asegura situasaun seguransa.

Bazea ba rezultadu ikus ne’ebé Sekretariadu Tékniku Administrasaun Eleitorál (STAE) fó sai, Kandidatu Prezidente Repúblika (PR) hosi CNRT Jose Ramos Horta hetan votu 301,481 (46,58%), kandidatu PR hosi FRETILIN Francisco Guterres “Lu-Olo” hetan votu 143,408 (22,16%).

Kandidata hosi KHUNTO Armanda Berta dos Santos hetan votu 56,289 (8,70 %), kandidatu independente Lere Anan Timur hetan votus 48,959 votu (7,57%), kandidatu hosi PD Mariano Assanami Sabino hetan 47,008 votus (7,57%), kandidatu hosi PDRT Anacleto Bento Fereeira hetan 13,059 (2,02 %).

Kandidatu indendente Martinho da Silva Gusmao hetan votu 8,485 (1,31% ), kandidatu independente Hermes da Rosa Correia Barros hetan votu 7,58 (1,23%), kandidata indendente Milena Pires hetan votu 5,335 (0,082%), kandidata independente Isabel da Costa Ferreira hetan votu 4,165 (0,64%).

Kandidatu independente Felizberto Araújo Duarte hetan votu 2,615 (0,40 %) Constancio Pinto hetan votus 2,474 (0,38%), kandidatu independente Rogerio Tiago Lobato hetan votu 2,028 (0,31%), kandidatu independente Virgílio da Silva Guterres hetan votu 1,685 (0,26%), kandidatu independente Antero Benedito hetan votu 1,531 (0,24 %) no kandidata independente Ángela Freitas hetan votu 692 (0,11%).

Notísia Relevante: Taur komprimenta Lere iha rezidénsia Farol

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here