Diretór Ezekutivu Klínika Bairru Pité (KBP), Inacio do Santos, .Imajen Tatoli/Antonio Dasiparu

DILI, 22 marsu 2022 (TATOLI)— Diretór Ezekutivu Klínika Bairru Pité (KBP), Inacio do Santos, informa iha inisiu fevereiru, Klínika Bairru Pité deside taka provizóriu sala baixa ba pasiente, maternidade, tratamentu médiku ba má nutrisaun no servisu saúde sosiál ba feto tanba hasoru hela krize finaseiru.

“Inisiu fevereiru ita taka sala baixa hodi la simu pasiente sira atu mai baixa iha klínika ne’e no servisu saúde sosiál ba feto, fó partu ba inan-isin rua no tratametu médiku ba má nutrisaun. Ita deside taka tanba relasiona ho orsamentu ne’ebé mak menus,” Diretór Ezekutivu Klínika Bairru-Pité, Inacio do Santos hateten ba jornalista sira iha nia kna’ar fatin-Lanud, tersa ne’e.

Iha tinan kotuk, Klínika Bairru Pité halo planu orsamentál hodi husu Governu no Parlamentu Nasionál aprova orsamentu rihun $258, atu apoiu servisu klínika ne’e, maibé infelizmente orsamentu aprova hosi Ministériu Saúde ho montante rihun $68.

Nune’e, planu sira ne’ebé trasa labele akontese tanba orsamentu la sufisiente no kontinua maneja orsamentu rihun $68 atu atividade iha klínika kontinua la’o nafatin.

“Ita deside taka fó pasiente baixa, maibé iha nia orsamentu laiha ba alimentasaun ka hahán ba pasiente ne’ebé kada tinan besik rihun $50 no eletrisidade kuaze rihun $15, orsamentu ba ambulánsia no pesoál saúde mós tenke barak. Nune’e ita halo kalkulasaun ba mai orsamentu ne’e boot liu no ita laiha orsamentu atu halo ida ne’e,’’ nia afirma.

Daudaun ne’e, Klínika ne’e mós redús ona profisionál saúde sira hosi na’in-16 ba na’in-neen de’it tanba osan laiha atu fó salariu.

“Ita nia parteira iha na’in-sia, maibé ita elemina na’in-neen ne’ebé hela nian-tolu, médiku na’in-ualu maibé agora iha na’in-neen,” nia informa.

Klínika Bairru Pité iha departamentu ualu, maibé haat mak funsiona hanesan departamentu HIV/SIDA, Tuberkuloze, Konsulta jerál no no dentaria. Enkuantu deside taka ona fó baixa ba pasiente, tratamentu médiku ba má nutrisaun, internamentu ba inan-isin rua atu partu no servisu saúde sosiál ba feto.

Notísia relevante:  Klínika Bairru Pité Atende Hela Pasiente Balun Ho HIV

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here