Uma Kbiit laek (UKL) iha suku Fatulia, postu administrativu Venilale, munisípiu Baucau. Imajen Tatoli/Natalino Belo.

DILI, 22 marsu 2022 (TATOLI)—Diretora Programa Nasionál Dezenvolvimentu Suku (PNDS), Claudinha Soares Pinto, hateten konstrusaun Uma Kbiit Laek (UKL) tinan 2021 territóriu nasionál atinje ona 75% no daudaun ne’e sei hela 25%.

“Konstrusaun Uma Kbiit Laek territóriu nasionál ba tinan kotuk ne’e ita atinje ona 75% no hela 25%, no atu konklui ona iha tinan ida-ne’e,” Diretora PNDS ne’e hateten ba Agência Tatoli, liuhosi telefónika, segunda ne’e.

Diretora ne’e hateten, hosi 25% ne’e mak seidauk konklui hotu inklui ho uma 19 ne’ebé to’o agora seidauk bele konstrui tanba uma ne’ebé atu konstrui ba benefisiáriu sira-ne’e balun hela iha área rurál no labele asesu dalan.

“To’o agora ita seidauk konstrui Uma Kbiit Laek sira hamutuk 19 tanba mobilizasaun materiál konstrusaun UKL atu lori ba iha fatin identifikasaun benefisiáriu nian maibé ita nia dalan mak difikulta, nune’e labele asesu no ita sei hein hela,” nia esplika.

Maibé, tuir nia, esforsu ne’ebé PNDS halo hodi responde ba problema sira-ne’e mak halo ona koordenasaun ho Institutu Jestaun Ekipamentu (IGE, sigla portugés) atu loke dalan iha suku sira-ne’ebé estrada ladi’ak, nune’e konstrusaun uma bele la’o tanba tuir planu, to’o tinan ne’e nia rohan tenke ramata konstrusaun uma ne’ebé define ona.

Maske nune’e, dezafiu ne’ebé daurante ne’e PNDS hasoru mak durante implementasaun iha situasaun COVID-19 no estrada tanba maiória benefisiáriu dook hosi vila.

Claudinha hateten, hosi Uma Kbiit Laek 19 ne’ebé to’o agora seidauk bele konstrui ne’e balun iha munisípiu Baucau, Manatuto, Covalima no munisípiu Lautém.

Enkuantu munisípiu ne’ebé konklui ona halo konstrusaun ba Uma Kbiit Laek ne’e mak Munisípiu Aileu, Dili, Ermera, Liquiça, Manufahi no seluk tan.

Benefisiáriu ba programa Uma Kbiit Laek (UKL) ne’e hamutuk 1.254 no osan ne’ebé prevee hamutuk miliaun $25 ne’e aloka ba suku 424 no kustu ba kada Uma Kbiit Laek ne’e entre $14.000 no $17.000.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here