Iluminasaun iha estrada dalan Palásiu Governu. Imajen Tatoli/Francisco Sony.

DILI, 22 marsu 2022 (TATOLI)—Adjuntu Prezidente Autoridade Munisípiu Dili (AMD), António Moniz Calau, informa nia parte informa ona ba Eletrisidade de Timor-Leste, Empreza Públika (EDTL, E.P) hodi normaliza iluminasaun iha kapitál Dili.

Notísia Relevante: AMD sei informa ba EDTL, E.P normaliza iluminasaun iha Kapitál Dili

“Lampu iha kapitál Dili ita informa ona ba EDTL atu normaliza lampu sira-ne’e, maibé to’o oras ne’e sira seidak informa mai ita atu haree kestaun saida mak lampu sira-ne’e avaria, maibé teknikamente sira-nia tékniku sira halo hela levantamentu iha terrenu hanesan iha jardin sira, inklui fatin públiku,” António Moniz Calau informa ba Agência Tatoli, iha nia knar fatin, Dili, tersa ne’e.

Komisáriu Ezekutivu Servisu Tékniku EDTL, Latino Jerónimo, hateten iha 2020 no 2021 EDTL normaliza ona iluminasaun públika iha estrada protokolu, ne’ebé iluminasaun iha estrada públiku hanoin laiha keixa, maibé dala ruma iha lampu ida-rua mak avaria tanba estrada protokolu hosi avenida Nicolau Lobato, Cristo Rei tesik mai Hudi Laran no Kulu Hun sira-ne’e iha hotu ona.

“Hanesan iha Dili laran, prinsipál rua avenida sira-ne’e iha hotu ona maibé ba dalan kiik sira ita planu hela, tanba ita lansa ona konkursu públiku iha fulan rua liubá no kompañia Vinot Patel mak manán. Maibé to’o agora nia seidauk hatama sasán, tanba sei iha difikuldade ba movimentu transporte ró ba-mai mak sei araska. Ne’ebé, ida-ne’e sei iha prosesu nia laran, nune’e bainhira liu fulan rua sira la fornese, entaun ami fó ona notifikasaun atu sira kumpre lalais ba kontratu ne’e tanba sira asina ona kontratu hodi hatama ekipamentu sira-ne’e,” nia dehan.

Tuir nia, iha fatin protokolu no públika balun mak iluminasaun avaria ne’e akontese hahú hosi Hotel Arbiru to’o mai Motael.

“Ida ne’e, ita-nia kolega tékniku sira halo hela identifikasaun, tanba iha ne’ebá monta desde 2002 entaun barak mós aat ona, tanba ai-rin balun ne’ebé besik tasi ne’ebá frujen ona. Entaun, programa ida-ne’e, ita prepara dokumentu no espesifikasaun hotu ona atu hahú halo konkursu públiku. Ne’ebé, ita-nia planu bainhira iluminasaun públiku sira-ne’e instala hotu ho kondisaun di’ak, ita sei integra ba Autoridade Munisípiu Dili atu sira mak responsabiliza kona-ba manutensaun no operasaun nian. Entaun EDTL hahú nia investimentu ba monta, hadi’a, monta foun no ida ne’ebé aat troka, hafoin ne’e sei integra ba Munisípiu Dili atu responsabiliza kona-ba manutensaun no operasaun ni’an,” nia hateten.

Entretantu, Kompañia Vitol Patel asina kontratu iha 21 dezembru 2021 ho totál orsamentu $580, 054 ho nia durasaun fulan tolu, hodi halo akizisaun ba ekipamentu iluminasaun públiku mai Dili atu EDTL, E.P monta.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here