Vise Ministru Negósiu Estranjeiru no Kooperasaun (MNEK), Julião da Silva, asina nota entendimentu ho Sekretáriu Jerál g7+, Helder da Costa. Iha salaun MNEK, segunda (21/03). Imajen Tatoli/Francisco Sony

DILI, 21 marsu 2022 (TATOLI)– Governu Timor-Leste iha kompromisu atu apoia finanseiru millaun $1, kada tinan, ba g7+ hodi bele finansia despeza iha nivél nasionál no mundiál.

Kompromisu Estadu Timor-Leste ne’e liuhosi asina ona akordu kooperasaun entre MNEK ho g7+ atubele hetan apoia orsamentu kada tinan.

Vise Ministru Negósiu Estranjeiru no Kooperasaun (MNEK), Julião da Silva. Imajen Tatoli/Francisco Sony

“Iha semana kotuk, Konsellu Ministru (KM) aprova ona atu ita asina akordu ho g7+, hodi ita suporta nafatin organizasaun ne’e, kada tinan hanesan tinan sira kotuk liubá,” Vise Ministru Negósiu Estranjeiru no Kooperasaun (MNEK) Julião da Silva, ba jornalista-sira iha salaun VIP MNEK Dili, segunda ne’e.

Notísia relevante:Governu kria akordu entre Timor-Leste no g7+

Governante ne’e dehan akordu apoia finaseiru ne’e hahú implementa hosi 2022 to’o 2026. Iha tinan sira kotuk liubá Estadu Timor-Leste labele apoia orsamentu ba g7+ tanba hasoru hela difikuldade orsamentu no Governu la’o de’it ho orsamentu doadésimu.

Iha biban hanesan, Sekretáriu Jerál g7+, Helder da Costa, hateten akordu ne’ebé sira halo tanba komprimísiu hosi Governu atu apoia g7+.

“Ida ne’e, komprimísiu Governu Timor-Leste nian ba g7+ tanba kada tinan tenke kontribui milaun $1 ba organizasaun ne’e. Hosi akordu ida ohin signifika boot tanba Governu Timor-Leste iha duni komprimisiu suporta g7+ atu ami bele finansia despeza g7+ nian iha nivél globál no nasional,” nia dehan.

Sekretáriu Jerál G7+, Helder da Costa. Imajen Tatoli/Francisco Sony

Tanba, Servisu importante g7+ nian iha área tolu importante ne’ebé sempre halo mak advokásia diplomasia iha nivél globál, Partilla esperiénsia ho nasaun barak hanesan eleisaun, rekursu naturál no mós kona-ba rekonsiliasaun no seluk tan.

“Akordu ne’ebé ami halo ohin ne’e atu selebra simbolikamente jestu Governu Timor -Leste nian ba g7+,” nia relata.

g7+ harii iha 10 abríl 2010, nuudar organizasaun intergovernamentál ne’ebe halibur hamutuk nasaun 20 ne’ebé afetadu hosi konflitu no frajilidade, hodi halo advokasia ba harii pás no harii Estadu hanesan xave ba dezenvolvimentu ne’ebé sustentavél.

Membru organizasaun internasionál g7+ kompostu hosi Timor-Leste, Afganistão, Burundi, Repúblika Centro-Africana, Chade, Comores, Costa do Marfim, República Democratica do Congo, Guiné, Guiné-Bissau, Haiti, Libéria, Papua Nova Guiné, Serra Leoa, Somália, Ilhas Salomão, São Tomé Príncipe, Sudão do Sul, Togo no Iémen

Enkuantu, g7+ nian Prezidente mai hosi Serra Leoa no Timor-Leste mak sai uma nain ho kuartél jerál iha Dili no edifísiu ida iha Lisboa, Portugál.

Iha tinan ida ne’e nia laran, sei iha tan reprezentante permanente g7+ nian iha Nova-Iorke, Estadus Unidu Amérika hodi hametin liután diplomasia no advokasia g7+ nian ba harii paz no harii Estadu.

Notísia relevante: ONU rekoñese g7+ nu’udar organizasaun multilaterál

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here