Kandidata Prezidente Repúblika períodu 2022-2007, Maria Helena Lopes de Jesus Pires, hala'o ona votasaun iha sentru votasaun Eskola No 5 Comoro, sabadu (19/03). Imajen Tatoli/Francisco Sony.

DILI, 19 marsu 2022 (TATOLI)—Kandidatu Prezidente Repúblika (PR) ho númeru sorteiu hitu (7), Maria Helena Lopes de Jesus “Milena” Pires, hateten manán ka lakon iha eleisaun prezidensiál 2022 ne’e votante sira mak sei deside.

Notísia Relevante: Manán iha eleisaun, kandidata Milena Pires hakarak hadi’a povu nia moris

“Ita iha kandidatu PR hamutuk 16 no hotu-hotu ko’alia ona ba eleitór sira maibé hanoin manán ka lakon ne’e votante sira mak sei deside,” Milena Pires hateten iha ámbitu eleisaun prezidensiál 2022, iha eskola primária 05, Comoro Dili, sábadu ne’e.

Iha eleisaun prezidensiál ne’e, kandidata Prezidente Repúblika independente ne’e, sei fó nia votu hanesan feto ne’ebé partisipa iha vida polítika no foti desizaun ba joven sira-nia desizaun.

“Ha’u hanoin uitoan tan fó ha’u-nia votu, votu ne’e la’ós de’it ba ha’u-nia diversífiku maibé votu ne’e ba feto mós no feto nia partisipasaun iha polítika, partisipasaun iha desizaun no mós ba joven sira-nia futuru,” Milena dehan.

Xefe Aldeia 30 Agosto iha Suku Comoro, António da Crus, hateten eleitór iha Aldeia 30 de Agosto kuaze 10.000-resin ne’ebé iha vontade hodi forma no ezerse sira-nia direitu iha estasaun eskola primária 05 Comoro, Dili.

Maske loron manas maibé votante sira ho pasiénsia no hein hodi ezerse sira-nia direitu votu hodi hili Prezidente Repúblika ne’ebé sira fihir no hakarak.

“Ha’u orgullu tanba ita-nia komunidade hosi Aldeia 30 de Agosto, 4 de Setembro no Aldeia Moris Foun iha vontade no entuziasmu hodi forma no hili sira-nia Prezidente Repúblika 2022-2027,” Xefe Aldeia 30 de Agosto hateten ba jornalista sira, iha eskola primária 05 Comoro, Dili, sábadu ne’e.

Votante no professor eskola filiál Beduku, Felizberto da Silva Soares, hateten nia rasik hakarak Prezidente Repúblika eleitu ne’e tenke halo mudansa ba povu no nasaun ne’e nia moris ne’ebé di’ak.

“Ha’u-nia esperansa katak ohin hili kandidatu ba Prezidente Repúblika Timor-Leste ba ema hotu-hotu no karik eleitu agora tenke haree ba povu no nasaun ne’e nia moris no halo mudansa ba dezenvolvimentu rai ida-ne’e nian,” nia dehan.

Profesós ne’e hatutan, karik iha buat ruma mak seidauk di’ak presiza hadi’a nune’e povu bele sente dezenvolvimentu ne’e iha.

Negosiante Eve da Costa Fernandes, husu ba PR eleitu atu haree ba povu liu-liu hamatan ba negosiante ambulant aka negosiante sira seluk ne’ebé sei moris iha mukit nia laran.

“Ami hakarak moris ho hakmatek hodi buka osan nune’e bele selu oan nia eskola no haree ba-an rasik, ba sé de’it mak sai Prezidente Repúblika. Ami lakohi halai tan hanesan uluk-uluk ne’e. Ami hakarak sira haree povu ne’ebé sei moris mukit nia-laran,” nia dehan.

Prezidente Komisaun Konsellu Libertasaun Nasionál (CCLN-sigla portugés), Vidal de Jesus’Reak Leman’, husu ba PR eleitu katak povu hili ona nune’e tenke halo desenvolvimentu ba rai ida-ne’e.

“Ha’u-nia esperansa ba Prezidente Repúblika eleitu la’o no kumpre tuir lei ne’ebé mak iha no tenke halo dezenvolvimentu ba rai ida-ne’e,” Reak Leman husu.

Vidal de Jesus husu atu PR eleitu tenke foti prestíjiu Timor-Leste perante mundu tanba imajen Timor-Leste iha mundu ladún di’ak. Tanba ne’e PR eleitu tenke haree ba povu no halo dezenvolvimentu nune’e povu bele goza moris ne’e.

Populasaun hosi Suku Comoro iha estasaun votasaun eskola primária 05 Comoro hodi forma hamriik hein tutuir malu iha lina laran hahú tuku 05h00 madrugada, hodi hein horas ba eleisaun hahú iha 07h00 no sei ramata iha 15h00 lorokraik.

Bainhira votasaun hahú brigada hosi Sekretariadu Tékniku Adminitrasaun Eleitorál (STAE) hasai urna mamuk hodi hatudu ba eleitór sira depois brigada, ofisiál eleitorál no fiskál sira inklui jornalista mak hahú vota uluk depois mak eleitór sira tuir.

Observasaun Agência TATOLI iha estasaun votasaun eskola primária 05 Comoro situasun la’o di’ak no kontroladu tanba hetan seguransa másimu hosi observadór nasionál no internasionál no mós Polísia Nasionál Timor-Leste (PNTL).

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here