Eleitór balun iha Sentru Votasaun Paralelu Eskola Tékniku Vokasionál (STM) Becora lamenta ho prosesu votasaun ne’ebé realiza, tanba sira ninia naran la sai iha fatin refere. Foto Tatoli/Cidalia Fatima.

DILI, 19 marsu 2022 (TATOLI)—Eleitór balun iha sentru votasaun paralelu Eskola Tékniku Vokasionál (STM) Bekora lamenta ho prosesu votasaun ne’ebé realiza iha fatin refere. Tanba, naran la sai iha lista eleitór ba eleisaun prezidensiál perióde 2022 -2027, maske halo ona rejistu liuhusi pesoál Sekretariadu Tékniku Administrasaun Eleitorál (STAE).

Eleitór husi munisípiu Viqueque, suku Maluro, Eugénio Nunes Pinto, sente triste labele ezerse nia direitu nu’udar sidadaun hodi tuir votasaun maske antes ne’e halo ona rejistu liuhusi pesoál STAE ne’ebé lori lista bá Universidade Nasionál Timor Lorosa’e (UNTL).


Eleitór husi Munisipíu Viqueque, Suku Maluro, Eugénio Nunes Pinto. Foto Tatoli/Cidalia Fatima

Eugénio Nunes Pinto hamutuk ho eleitór kuaze 20 hato’o ona asuntu ne’e ba parte STAE maibé konfirma katak laiha mekanizmu seluk hodi rezolve problema refere.

“Hau sente triste tebes tanba ha’u rejistu iha UNTL no bainhira ohin ha’u mai atu ezerse direitu iha ne’e maibé ha’u konfirma ba naran la mosu iha ne’e. Sente triste tebes ba ida ne’e tanba ha’u lakon direitu. Ami hato’o ona ba sira maibé dehan laiha mekanizmu seluk atu rezolve ba iha problema ida ne’e”, Eugénio Nunes Pinto dehan ba jornalista iha sentru votasaun paralelu STM Bekora, sábadu ne’e.

Iha fatin hanesan, eleitór husi munisípiu Viqueque, Ana Berta dos Santos, ne’ebé la rejista hodi tuir votasaun iha sentru paralelu lamenta ho STAE nia servisu tanba la konsege fó sosializasaun klean ba komunidade atu bele halo rejistu.

“Ha’u rekoñese katak ha’u la rejista duni, maibé ne’e tanba ha’u lahatene no la rona informasaun konaba ida ne’e. Tuir loloos tenke sosializa liuhusi xefe aldeia sira no xefe suku sira iha kada bairru”, Ana Berta hateten.

Hatán ba preokupasaun, prezidente sentru votasaun paralelu STM Bekora, Domingas Soares, esplika dader ne’e iha eleitór barak mak hato’o ona sira nia problema hanesan. Maibé, sentru votasaun paralelu atende de’it eleitór sira ne’ebé naran hakerek iha lista ne’ebé destaka husi STAE nasionál.

“Prosesu rejistu ne’e antes  ne’e halo husi fevereiru to’o loron 03 marsu ne’e. Formuláriu ami fahe hotu no ami ba too iha eskola sira, merkadu  no ami mos avizu ba eleitór husi munisípiu sira bele vota iha ne’e. Ohin eleitór balun mai ko’alia dehan sira rejistu maibé naran laiha. Ami husi sentru paralelu bazeia de’it ba lista ne’ebé destaka ona husi STAE nasionál mai ami. Se karik naran iha lista mak sei vota, kuandu naran laiha ami labele atu autoriza vota”, Domingas Soares esplika.

Totál votante husi sentru votasaun paralelu tolu iha munisípiu Dili hamutuk 4032. Enkuantu husi sentru votasaun paralelu STM Bekora atende de’it ba eleitór hamutuk 1641 ne’ebé rejistadu ona tuir dadus husi STAE nasionál ba eleitór husi munisípiu tolu hanesan Lautein, Baukau no Vikeke.

Observasaun iha Tatoli iha terrenu nota katak, eleitór sira kontinua protesta atu bele ezerse sira nia direitu maske STAE fó ona esplikasaun katak eletór ne’ebé naran laiha lista sei labele tuir votasaun ba eleisaun prezidensiál 2022-2027.

Eleisaun iha sentru votasaun paralelu STM Bekora hetan mós seguransa másima husi Polisía Nasíonal Timor-Leste (PNTL) no akompaña husi pesoál observadór husi Misaun Observasaun Uniaun Europeia, Komisaun Nasionál ba Eleisaun (CNE, sigla portugés) no seluk tan.

Jornalista : Cidalia Fátima

Editorá     : Armandina Moniz

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here