Fiskais ida halo votasaun uluk. Iha sentru votasaun Eskola No 5 Comoro, sabadu (19/03). Imajen Tatoli/Francisco Sony

DILI, 19 marsu 2022 (TATOLI)- Bispu Metropolitana Dioseze Dili, Don Virgílio do Carmo da Silva, husu ba kandidatura na’in 16 ne’ebé kompete iha eleisaun atu simu rezultadu tuir realidade ne’ebé iha tanba povu mak determina.

“Agora ita hotu hein rezultadu ne’ebé mak mai, liuliu ba kandidatura sira hotu tenke simu rezultadu tanba ne’e la’ós ita mak termina maibé povu mak termina”, dehan amu Bispu ne’e ba TATOLI iha sentru votasaun Lecidere Dili, sabadu ne’e.

Nia dehan, rezultadu hotu ezerse totalmente hosi povu. Ho nune’e kandidatu ne’ebé la manán tanba la’ós nia dalan hein tinan seluk mak kompete fila fali karik povu fó fiar bele sai Prezidente Repúblika.

“Kandidatu sira ne’ebé lakon lalika laran susar, buat hotu tuir mós Maromak nia planu, se Maromak planu o atu sai duni prezidente ba rai ne’e, loron ida sei sai duni Prezidente ba rai ne’e, se la sai ne’e laos o nia dalan, sei iha dalan seluk hodi kontribui atu hadia rai ida ne’e”, amu Bispu ne’e relata.

Lider igreja Katólika ne’e husu ba povu hotu atu mantein pás no estabilidade iha eleisaun ne’e bainhira rona rezultadu.

“Iha tempu kampaña mosu ona konflitu uitoan, maibé iha eleisaun ne’e ita tenke mantein pás no estabilidade, rezultadu hotu povu mak termina, nasaun hotu agora tau matan hela mai ita kona-ba ita nia demokrasia ne’e, ne’ebé ita mak mantein pás atu hatudu ita nia imajen di’ak ba mundu”, nia dehan.

Don Virgílio ezerse nia votu iha sede suku Lecidere iha oras tuku 08:00 dader otl. Iha sentru votasaun ne’e parte dader la’o iha situasaun kontroladu tanba hetan seguransa másimu hosi Polísia Nasionál Timor-Leste (PNTL).

Jornalista       : Hortencio Sanchez

Editór             : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here