Kandidatu Prezidente Repúblika Tinan 2022-2027, Costãncio Pinto. Imajen Tatoli

DILI, 19 marsu 2022 (TATOLI) – Kandidatu Prezidente Repúblika (PR) ho númeru sorteiu 11, Constâncio Pinto ‘Terus’, hatete eleisaun prezidensiál tinan ne’e krusiál tebes ba futuru Timor-Leste tanba povu presiza líder foun ho vizaun foun hodi dezenvolve nasaun.

Kandidatu independente ne’e afirma bainhira la eleitu iha eleisaun prezidensiál períodu 2022-2017, sei prepara-an di’ak liután iha eleisaun tuirmai.

Kandidatu Prezidente Repúblika (PR) ho númeru sorteiu 11, Constâncio Pinto ‘Terus’.

“Se la eleitu, ha’u kontinua prepara ba futuru no kontinua serbí nasaun ida ne’e liuhusi dalan seluk. Hanesan ho kandidatu sira seluk, objetivu mak atu manán eleisaun, maibé karik lakon, ha’u sei la estresa no kontinua prepara-an ba oin”, Constâncio Pinto hateten hafoin ezerse votu iha eskola Cristal 05, iha Balide, Dili, sábadu ne’e.

Kandidatu ho númeru 11 ne’e promete bainhira eleitu, sei kumpri promesa iha komísiu eleitorál, oinsá atu kontribui ba dezenvolvimentu, rezolve problema ne’ebé nasaun enfrenta, konsolida fali Estadu direitu demokrátiku no buka atu promove Timor-Leste ba mundu.

“Ha’u sei halo serbisu ne’ebé hatuur ona iha konstituisaun. Buka atu koopera ho entidade no instituisaun hotu-hotu, órgaun Estadu sira, sosiedade sivíl no joven sira oinsá atu serbisu hamutuk hodi dezenvolve nasaun ida ne’e”, akresenta.

Constâncio Pinto konsidera partisipasaun sívika iha eleisaun ne’e sei halo mudansa ba dezenvolvimentu país, prinsipalmente envolvimentu joven sira.

“Ha’u-nian espetativa mak ne’e hein katak rezultadu eleisaun ne’e lao ho di’ak no ita hotu konsentra ba dezenvolvimentu”, nia hatete.

Entretantu sentru votasaun eskola Cristal pertense ba suku Mascarenhas ho nia sentru tolu, estasaun hitu no total eleitor 4.950.

Iha eleisaun ne’e observa direta husi observadór internasionál, inklui observadór kada kandidatu no fiskál sira no hetan seguransa másima husi Polísia Nasionál Timor-Leste (PNTL).

Notísia relevante: Constâncio Pinto promete sei prioritiza asuntu neen no PED bainhira eleitu ba PR

Jornalista: Afonso do Rosário

Editora: Maria Auxiliadora

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here