Kandidatu Prezidente Repúblika (PR) períodu 2022-2027 ho númeru sorteiu 05, Anacleto Bento Pereira. Imajen Tatoli/Nelia Fernandes.

DILI, 19 marsu 2022 (TATOLI)—Kandidatu Prezidente Repúblika (PR) períodu 2022-2027 ho númeru sorteiu 05, Anacleto Bento Pereira, garante nia kaixa votasaun iha suku Kuluhun sei la mamuk no rezultadu saida de’it mak akontese liuhosi prosesu ida dermokrátiku ne’e nia simu ho responsabilidade.

“Kada kandidatu iha nia otimizmu rasik, iha ida-ne’e ha’u-nia bairru no hela fatin, garantia ne’ebé mak iha katak sei iha votante mai ha’u no ha’u-nia kaixa sei la mamuk. Maibé manán ka la manán ida-ne’e país demokrátiku ne’ebé mak adopta ona sistema demokrásia ne’e, tantu tenke simu rezultadu kualker saida mak atu mai. Maibé interese mak rezultadu ne’e sai hosi solusaun no prosesu ida demokrátiku no prosesu ida pasifiku no prosesu ida laiha influénsia ida hosi parte seluk. Tantu, rezultadu saida de’it mak mai tenke simu nu’udar sidadaun ida ho responsabilidade,” Anacleto Bento Pereira, hateten ba jornalista sira hafoin ezersevotu iha sentru votasaun Eskola Primária Númeru-4 Kuluhun, Dili, sábadu ne’e.

Bainhira la elitu, nia dehan, nia parte laiha preferensia ideál Prezidente Repúblika ba RDTL maibé  hanesan sidadaun ida nia sempre apoiu tuir rezulatdu votasaun ne’ebé sei akontese.

“Maibé, preferensia ha’u prefere ha’u-nia aan no ha’u la prefere ba ema seluk. Tanba rezultadu ita seida’uk hatene ne’ebé ha’u labele halo preferensia ba fali ema ida, enkuantu ha’u mós kandidatu hela an. Tanba ne’e, se ha’u-nia kandidatura la liu ne’e depende ba rezultadu eleisaun ida ne’ebé mak mai nu’udar sidadaun ida ha’u apoia,” nia dehan.

Tanba ne’e, nia iha esperansa katak eleisaun tinan ne’e, eleisaun ho partisipasaun ida ho númeru ida másimu, tanba tuir rejistu ne’ebé mak iha katak sidadaun rihun 800-resin mak partisipa iha eleisaun, ne’ebé buat ne’ebé di’ak se partisipasaun ne’e atinje númeru ne’ebé rejistadu ne’e vitória ida mesak ba Timor-Leste.

“Maibé fora hosi kestaun sé mak manán no sé mak eleitu, ida-ne’e se partisipasaun ne’ebé pasiva ho totál rejistu ne’e vitória ida mai Timor-Leste, tanba espresa ona vontande populár no vontade demokrátika konxiénsia povu nian atu bele ezerse sira-nia direitu nu’udar sidadaun,” nia hateten.

Sentru votasaun iha suku Kuluhun hamutuk tolu, ida iha sede suku Kuluhun no rua seluk iha Eskola Primária Númeru-4 Kuluhun.

Eleisaun iha sentru votasaun ne’e hetan observasaun hosi observadór nasionál, internasionál, fiskál hosi kandidatu sira, brigadista, ofisiál eleitorál hosi Sekretariadu Tékniku Administrasaun Eleitorál (STAE), Komisaun Nasionál Eleisaun (CNE sigla portugés) no hetan seguransa másimu hosi Polísia Nasionál Timor-Leste (PNTL).

Enkuantu, totál komunidade iha suku Kuluhun hamutuk 9.910, ne’ebé mai hosi aldeia hitu (7), hanesan aldeia Toko Baru, Nato, Soru Mutu ba Dame, Lao Rai, Tane Mutu, Funu Hotu no Loe Laco.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here