Materiál eleisaun sensitivu no non sensitivu. Imajen Tatoli/Celestina Teles.

COVALIMA, 18 marsu 2022 (TATOLI)—Administradór Munisípiu Covalima, Francisco de Andrade hateten, Sekretariadu Tékniku Administrasaun Eleitorál ho Komisaun Nasionál Eleisaun (CNE, sigla portugés) distribui ona materiál sensitivu no non sensitivu ba sentru votasaun 80 no estasaun votasaun 92. 

“Ohin ami halo distribuisaun materiál sensitivu ho non sensitivu ba sentru votasaun sira,” Autoridade Munisípiu Covalima, Francisco de Andrade hateten, ba jornalista sira iha kampu eis eskola pre-sekundáriu Sandolo, Kampung Baru, sesta ne’e.

Timor-Leste adopta nasaun demokrátiku eleisaun ema ida-idak ezerse nia direitu ba sé de’it mak nia hakarak hili maibé ho kondisaun ne’ebé mak labele hemu lanu no bainhira halo impedimentu durante eleisaun mak seguransa sei foti medida.

Sidadaun ne’ebé di’ak ne’e tenke partisipa másimu iha eleisaun prezidensiál 2022 ne’ebé realiza tinan lima dala ida, partididu politiku no líder komunitáriu sira tenke kolabora no sidadaun hotu iha dever atu tuir vota.

“Ita harii nasaun ho raan ho ruin nia leten. Ita-agradese ohin-ita sei moris hodi goza ukun rasik an ida-ne’e, komunidade postu administrativu hitu (7), suku 30 tenke partisipa masímu eleisaun hodi fó kontribuisaun nasaun nia dezenvolvimentu,” nia relata. 

Diretór STAE Covalima, Francisco Gusmão, reforsa iha munisípiu Covalima hahú halo ona distribuisaun materiál sensitivu no non sensitivu ba sentru votasaun sira iha munisípiu Covalima.

“Ohin iha territóriu Timor tomak ita halo distribuisaun materiál eleisaun ba sentru votasaun no estasaun votasaun inklui munisípiu Covalima mós halo distribuisaun materiál sensitivu ho non sensitivu,” nia hateten.

Preparasaun ba eleisaun ne’ebé sei realiza iha loron 19 fulan-marsu ne’e, STAE Covalima halo rekrutamentu ba brigada na’in-80 hodi destaka iha sentru votasaun no estasaun votasaun ne’ebé mak STAE Covalima identifika ona.

Enkuantu, STAE Covalima simu materiál sensitivu ho non sensitivu iha loron 11 fulan-marsu ho totál livru buletin votu hamutuk 1070 no urna 240. 

Dadus hosi STAE eleitór ne’ebé atu ezerse nia direitu iha loron 19 fulan-marsu ne’e hamutuk 47,807 kompostu hosi mane 2,4446 no feto 2,3361.

Jornalista : Celestina Teles

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here