VIQUEQUE, 17 marsu 2022 (TATOLI)—Sekretariadu Tékniku Administrasaun Eleitorál (STAE) munisípiu Viqueque, kinta ne’e, finaliza ona verifika no halo pakote materiál ba Eleisaun Prezidensiál hodi distribui ba sentru votasaun.
“Ohin ami finaliza ona halo pakote materiál sira ne’ebé sensitivu no naun sensitivu ba Eleisaun Prezidensiál ba períodu 2022-2027 iha munisípiu Viqueque. Nune’e, loron 18 marsu ne’e hahú halo distribuisaun ba fatin votasaun,” Diretór Servisu STAE munisípiu Viqueque, Humberto da Costa, informa ba Agência TATOLI, iha salaun munisipál.
Materiál sentivu hotu ona, enkuantu ba naun sensitivu hanesan kartaun ba ofisiál no karimbu maka daudaun lojíztika nasionál lori ona mai hodi halo kompleta materiál sira.
“Materiál naun sensitivu orsida to’o, entaun ami segel ona hodi prepara ba distruibuisaun,” nia realsa.
Notísia relevante: STAE Viqueque verifika buletin 11 kona tinta
Materiál eleisaun ne’ebé STAE Viqueque simu hamutuk kaixa 23, ne’ebé iha livru buletin votu hamutuk 1.321 no folla hamutuk 66.500.
Tuir dadus, númeru eleitór Eleisaun Prezidensiál 2022 iha munisípiu Viqueque hamutuk 58.421, kompostu hosi mane 29.675 reprezenta 51% no feto 28.746 reprezenta 49%.
Munisípiu Viqueque estabelese ona sentru votasaun hamutuk 92 no estasaun votu 110 iha postu lima.
Jornalista : Vitorino Lopes da Costa
Editora : Julia Chatarina
