Diretór Ezekutivu Sentru Formasaun Fundasaun Hadomi Timor, Abrão Monteiro. Imajen/Esesiál.

DILI, 17 marsu 2022 (TATOLI)—Sentru Formasaun Fundasaun Hadomi Timor (SFFHT) koopera ho Timor Plaza realiza kompetisaun biblioteka dijitál ba públiku hodi fornese matéria ba ka referénsia ba estudante no manorin sira.

“Ami halo kompetisaun ida-ne’e hanesan atividade regulár tanba ami planea ona iha ami-nia planu anuál Fundasaun Hadomi Timor ni’an ne’ebé ami koopera ho Timor Plaza hodi realiza kompetisaun ne’e. Tanba, ita hatene katak tinan rua ba kotuk ita iha limitasaun oioin, bainhira hasoru pandemia COVID-19, ita-nia mestre la konsege fornese nia matéria ba estudante sira, nune’e estudante sira mós la konsege hetan matéria ne’ebé di’ak atu bele estuda. Entaun, ho dezáfiu sira ne’e ami hanoin katak ita presiza kria sistema ida-ne’ebé bele fornese matéria ka referensia ba mestre no estudante sira,” Diretór Ezekutivu Sentru Formasaun Fundasaun Hadomi Timor, Abrão Monteiro, hateten ba Ajénsia Tatoli, iha nia kna’ar-fatin, Faról, Dili, kinta ne’e.

Durante ne’e ema hotu depende de’it ba biblioteka ne’ebé konsidera hanesan manual no ema tenke to’o iha fatin refere mak foin lee livru, entaun iha tempu pandemia nia laran sai hanesan dezáfiu boot ba estudante sira atu lee livru no estuda.

“Ami hanoin katak ita presiza kria biblioteka dijitál atu bele tau matéria, informasaun, referénsia, modul no matadalan sira-ne’ebé fornese hosi mestre no dosente sira ba kualker área atu sira bele tau iha biblioteka dijitál, nune’e ita-nia estudante sira bele asesu bainhira de’it no iha ne’ebé de’it,” nia afirma.

Kompetisaun ne’e hahú rejistu iha loron 01 to’o 10 fulan marsu tinan ne’e, maibé daudaun ne’e Fundasaun Hadomi Timor extende tan to’o loron 19 marsu ne’e.

Rekezitu ba kompetisaun ne’e mak rejistrasaun ho osan $5.00 ba individuál ka grupu másimu ema-na’in tolu no hatama mós dokumentu hanesan Billete Identidade (BI), Eleitorál no Sertidaun RDTL.

Aleinde rekezitu ne’e, iha mós rekezitu seluk hanesan linguajen programasaun, wordpress, drupal no joomla, no matéria ne’ebé públika iha website biblioteka dijitál labele kopia hosi internet.

“Kada kompetitór sei aprezenta website ida-idak iha loron 22-24 fulan marsu tinan ne’e iha Fundasaun Hadomi Timor, nune’e aprezentasaun ikus iha loron 26 marsu iha Timor Plaza. Kada website ne’ebé mak kompetitór sira tuir obrigatóriu rai ka kopia hotu iha Fundasaun Hadomi Timor,” nia dehan.

Diretór Fundasaun Hadomi Timor ne’e aumenta, iha kompetisaun ne’e kada kompetitór sei hetan ba manan-na’in ida (1) ka grupu ida de’it ho osan montante $200.00 ho taxa.

Kompetitór sira-ne’ebé mak la sai vensedór sei iha oportunidade hetan sertifikadu. Iha kompetisaun ne’e, ekipa juri hamutuk na’in-tolu mak Abrão Monteiro, José Soares no Hermundos Barreto.

Entretantu ekipa organizadór ba kompetisaun biblioteka dijitál hanesan Hermundos Barreto, Melia De J. Carvalho, Elia Amaral no Crisogno de Carvalho.

Formasaun internet saudavel ba foinsa’e sira

Entretantu, nia informa, Governu liuhosi Sekretáriu Estadu Juventude no Desportu (SEJD) koopera ho Sentru Formasaun Fundasaun Hadomi Timor (SFFHT) fasilita formasaun internet saudavel ba foin-saé sira iha Timor-Leste.

“Fundasaun Hadomi Timor dadaun ne’e iha ona prosesu kooperasaun ho Sekretáriu Estadu Juventude no Desportu oinsa atu fó formasaun kona-bá internet saudavel ba ita-nia joven sira iha munisípiu 12 inklui RAEOA,” nia dehan.

Programa formasaun ne’e planu anuál SEJD ni’an ne’ebé sira hakarak Fundasaun Hadomi Timor mak sai implemetadór ba programa ne’e. Agora daudaun iha hela prosesu nia laran, hanesan elabora hela matéria nune’e iha tempu badak sei asina kontratu entre Fundasaun Hadomi Timor ho SEJD no sei implementa iha fulan maiu.

Tarjetu ne’ebé Fundasaun Hadomi Timor atu fó formasaun internet saudavel ba joven sira, tuir polítika Governu ni’an katak joven ne’e idade hosi 12 to’o 25 iha territóriu laran no iha munisípiu  ne’e sentru juventude kada munisípiu mak sei organiza no mobiliza ema na’in-60 atu nune’e Fundasaun Hadomi Timor fó formasaun ba sira.

Tanbá, movimentu téknolojia agora daudaun ne’e iha Timor-Leste no rai-li’ur nia movimentu makaas tebes no afeta mós sosiedade Timor-Leste to’o uza internet la efisiénsia, maibé sira uza ba iha nesesidade ne’ebé bele prezudika ema seluk nia ativdade no bele hatun fali ema-nia dignidade.

Matéria ba formasaun ne’e Fundasaun Hadomi Timor koloka ba parte rua mak matéria teoria, ne’ebé sei ko’alia kona-bá movimentu no prosesu dijitalizasaun iha Timor-Leste ne’e oinsá no dadus utilizasaun Timor-Leste nian ba teknolojia ne’e.

Matéria daruak, Fundasaun Hadomi Timor atu halo prátika ka aprende atu fó formasaun ida-ne’e ba joven sira atu prátika oinsá bele utiliza plataforma sira hanesan blogspot atu sira bele utiliza internet ho matenek.

Matéria seluk maka rekomendasaun ba aplikasaun sira, tanba dala ruma estudante no joven sira ladun hatene, maske sira iha laptop no telefone ne’ebé kualidade di’ak maibé sira ladún hatene aplikasaun ne’ebé merese atu sira uza tuir sira-nia nesesidade.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here