Diretora STAE RAEOA anunsia rezultadu verifikasaun buletin votu iha salaun Alfándega, Palaban kuarta ne'e. Imajen Tatoli/Abílio Elo Nini.

OÉ-CUSSE, 16 marsu 2022 (TATOLI) – Sekretariadu Tékniku Administrasaun Eleitorál (STAE), Rejiaun Administrativa Espesiál Oé-Cusse Ambeno (RAEOA), deteta buletin votu hamutuk 198 inválidu ka aat hafoin deteta iha prosesu verifikasaun durante loron-tolu.

Diretora STAE RAEOA, Luiza da Costa, hatete, relasiona ho prosesu verifkasaun buletin votu iha salaun Alfándega, Palaban, Oé-Cusse durante loron tolu, hahú segunda 14 to’o kuarta 16 marsu ne’e, ekipa brigadista hamutuk ho STAE deteta buletin votu 198 inválidu tanba balun kuak, fo’er no balun númeru seriál aat.

“Rezultadu prosesu verifikasaun durante loron-tolu, tékniku sira deteta buletin votu balun númeru seriál laiha 57, númeru seriál dupla tolu, númeru seriál tesi aat ida, iha marka tinta impresora 10, iha sinál 33, nakles 92 no númeru seriál nakfila 2, ne’ebé totál hamutuk 198 mak sei tau karimbu kanseladu,” Luiza da Costa, relata rezultadu verifikasaun ne’e ba reprezenatnte kandidatu sira iha salaun Alfandega, Oé-Cusse, kuarta ne’e.

Diretora STAE informa, totál buletin votu ne’ebé simu hosi nasionál hamutuk 21 kaixa ho kuantidade livru 1.166, durante prosesu verifikasaun loron tolu, hetan supervizaun hosi Komisaun Nasionál Eleisaun (CNE, sgla portugés), akompaña hosi reprezentante kandidatu sira na’in-16, nomoos hetan seguransa másima hosi Polísia Nasionál Timor-Leste (PNTL).

“Hakarak informa katak, maioria buletin votu ne’ebé nakles kona kandidatu prezidente sira hotu na’in-16, ne’ebé kompete iha eleisaun prezidensiál períodu 2022-2027,” nia informa.

Hafoin relata rezultadu ne’e, reprezentante kandidatu rezidente repúblika hosi José Manuel Ramos Horta ho númeru sorteiu 14, Rofino Rao da Costa, konkorda ho prosesu rezultadu ne’e tomak, importante parte STAE tau karimbu kanseladu.

“Ami loron tolu, akompaña prosesu verifikasaun ne’e la’o di’ak, nia rezultadu ne’ebé relata sai ne’e, klaru ami mós iha dadus, tán ne’e ita konkorda halo kedas karimbu kanseladu, nune’e labele lori ba sentru votasaun atu fó ba eleitór-sira uza hodi vota,” nia katak.

Entretantu, antes ne’e materiál sensitivu no la’ós-sentivu, transporta hosi nasionál to’o Oé-Cusse iha loron-sábadu dadeersan, tuku 6:00 liuhosi ro Berlin Ramelau, ho totál no kuantidade mak hanesan urna hamutuk 247, kabina votu kuantidade 300, selus kuantidade 2,400, tinta indelivél 352, stiker kódigu sentru votasaun 264.

Nune’e mós buletin votu, akta operasaun estasaun votasaun 88, akta operasaun sentru votasaun 60, akta rezultadu sentru votasaun 1.020, lista votante 352, lista adisionál 88, lista funsionáriu votu 88, lista prezensa ofisiál monitorizasaun 88.

Nune’e mós lista fiskál vota 88, lista prezensa observadór 88, lista prezensa fiskál 60, lista prezensa fiskál apuramentu munisípál ida, formuláriu termu entrega materiál 188, formuláriu termu entrega urna 60, termu entrega akta rezultadu sentru votasaun 60.

Livru formuláriu reklamasaun 88, deklarasaun segredu 88, folla aviza 176, kódigu sentru votasaun 60 no kódigu estasaun votasaun 88, envelope akta operasionál sentru votasaun 60 no envelope akta operasionál estasaun votasaun 88, envelope la-uza 88, envelope kanseladu 88, envelope abandonadu 88, envelope nulu 60, envelope branku 60, lista prezensa profisionál komunikasaun sosiál 88.

Nune’e iha akta rezultadu verifikasaun buletin votu ne’ebé fó-sai iha kuarta ne’e, iha ona konkordánsia, ne’ebé hetan asina aprovadu hosi diretóra STAE RAEOA, Luiza da Costa, diretór CNE RAEOA, Tomás Oqui Meta, Komandante PNTL RAEOA, Superintendente Xefe Mateus Assunção Mendes inklui reprezentante kandidatu na’in-16.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here