Kandidatu Prezidente Repúblika independente ba períodu 2022-2027, Felizberto Araújo Duarte, halo kampaña iha merkadu Gleno, Ermera. Imajen TATOLI/Anito Soares

DILI, 16 marsu 2022 (TATOLI)–Kandidatu Prezidente Repúblika (PR) independente ba períodu 2022-2027, ho númeru sorteiu 15, Felizberto Araujo Duarte ‘Tony’, mai ho lema ‘Timor-Leste Prósperu ho esforsu jerasaun foun’.

Felizberto Duarte hanesan Kandidatu PR ho otas kiik-liu  kompara ho kandidatu 15 sira seluk otimista ho nia kandidatura, tanba Konstituisaun fó dalan no mai ho esperiénsia lubuk ida iha área ekonomia no justisa.

Notísia relevante: Felisberto Araújo sei koordena ho Governu estabelese presu mínimu ba kafé bainhira eleitu

Bainhira hetan fiar hosi povu, Felizberto hakarak kolabora ho Governu halo reforma justisa hodi halo lei ba ema ho kargu ligadu ho justisa, hanesan juiz, prokuradór, inspetór jerál no seluk tan, tenke desvinklula-an hosi polítiku durante tinan 5 to’o 10, nune’e hafoin sira asume kargu ne’e, sira sai hosi vida polítika.

“Termina ona kargu ligadu ho justisa, sira labele diretamente asume kargu polítiku hanesan Embaixadór ka Ministru, se lae bele halo desizaun ne’ebé estraga adversáriu polítiku, atu sira bele ba tama vida polítika ho di’ak,” Felizberto dehan.

Karik sai PR, Felizberto sei komunika ho Governu atu estabelese presu mínimu ba produtu nasionál hanesan kafé no produtu seluk tan ne’ebé iha poténsia exportasaun, nune’e bele fó prospriedade ba negosiante lokál sira.

Biografia

Felizberto Araujo Duarte, moris iha Dili, iha loron 01 juñu 1978, hosi maun alin na’in-neen.

Oan hosi Enfermeiru Matias Gouveia Duarte (Hunuk), ne’ebé lakon iha setembru 1999, hanesan responsável Jerál Saúde, Konsellu Nasionál Rezisténsia Maubere (CNRM, sigla portugés) hosi Same, Manufahi, no  Pascoela de Araujo, hanesan dona de casa, hosi Same, Manufahi.  

Antes ne’e, frekuenta Kelas Persiapan Atas, Eskola Sekundária Mertoyudan, iha Jogjakarta, Indonézia (Jesuitas), Eskola Sekundária Paulos IV no Eskola Sekundária São José, Balide no Semináriu Balide, Eskola Pre-Sekundária, Semináriu Dom Filipe Rinaldi, Salesianu de Dom Bosco, Baucau, no Eskola Primária nú. 3, Kampu Demokrásia.

Konsege hetan bolsa estudu oinoin hanesan bolsa estudu Bispo Belo iha Universidade Nasionál Timor-Leste (UNTL), Australian Aid iha Victoria University, Austrália no Global Embaixadór iha Institutu Dezenvolvimentu Koreia, Koreia Súl. 

Hasai Lisensiatura inkompletu, espesializada iha inglés, iha Universitas Nasionál Timor Timur (atuál UNTL) tanba separasaun Timor-Leste hosi Indonézia iha 1999, Lisensiatura iha Bankáriu no Finanseiru hosi Victoria University, Austrália, sertifikadu graduasaun iha Jestaun Organizasionál hosi Queen’s University of Belfast, Reinu Unidu.

Nune’e mós, Pós-Graduasaun iha Direitu Públiku (espesializasaun iha Konstitusionál, Administrativu e Fiskál) iha Pontifícia Universidade Católica do Rio Grande do Sul, Brasil no ikus liu mestradu iha Polítika Públika espesializadu iha Finansa Públika, Polítika Sosiál, Dezenvolvimentu Rejionál no Polítika Ambientál, hosi Institutu Dezenvolvimentu Koreia, Koreia do Sul.

Ho nível edukasaun ne’ebé nia iha, Felizberto Duarte fluente iha inglés, portugés, tétum, Indonézia no Españól.

Iha tinan 1991, hamutuk ho nia família subar Komandante Kay Rala Xanana Gusmão iha rina-nia uma Kuluhun, Dili, ne’ebé rezulta nia inan-aman tama prizaun durante tinan-lima resin. Iha sira-nia uma ne’e mós konsege hasoru malu ho jornalista hosi Japaun hodi halo entrevista. 

Iha tinan 1995, Felizberto Duarte reprezenta Timor-Timur (atuál Timor-Leste) hodi hasoru malu ho Jenerál fitun lima, Suharto, Prezidente Repúblika Indonézia iha ámbitu programa Estudante Matenek hosi provínsia hotu iha Indonézia hamutuk 27, maski iha tempu ne’ebá nia aman hanesan dadur hela iha komarka Becora.  

Iha tempu independénsia, ho nível edukasaun ne’ebé nia iha, Felizberto Duarte kontribui ba dezenvolvimentu hodi asegura investimentu Heineken ho valór investimentu por volta millaun $45, hodi investe fábrika iha Hera. 

Aleinde ne’e, nia kontribui mós ba kombate korrupsaun, hodi hatama antigu Embaixadór Timor-Leste ba Nasaun Unida ba prizaun durante tinan-rua no fulan-neen, no selu multa $50.000, ne’ebé hanesan inkluziva kazu kriminál seluk envolve servidór Estadu sira.   

Experiénsia Serbisu 

Antes ne’e, Felizberto Duarte hanesan Asistente Espesiál iha Ministériu Negósiu Estranjeiru no Kooperasaun iha Gabinete Ministru José Ramos Horta,  hanesan mós Koordenadór Embaixada Timor-Leste iha Beijing, Xina. Nia mós asume ona kargu hanesan Diretór Jerál Administrasaun iha Ministériu Negósiu Estranjeiru no Kooperasaun.

Sai ona asesór iha Gabinete Sekretaria Estadu ba Promosaun Igualdade (SEPI), Asesór Sénior, Xefe Gabinete no Pontu Fokál Fórum Macau no Asosiasaun Nasaun Sudeste Aziátiku (ASEAN, sigla inglés) iha Gabinete Sekretária Estadu ba Apoiu no Promosaun Setór Privadu (SEAPRI).

Asume kargu hanesan Rezidente Ajénsia Espesializada Investimentu (AEI), sai Responsável ba Jestaun Informasaun Operasionál Nasaun Unida ba Programa Ai-han Mundiál (WFP, sigla inglés).

Ikus liu, kargu atuál ne’ebé Felizberto Duarte asume mak hannesan Diretór Nasionál Administrasaun no Finansa iha Autoridade Nasionál ba Água no Saneamentu, Institutu Públiku, (ANAS, I.P), ne’ebé tutela ba Ministériu Obra Públika.

Jornalista : Julia Chatarina 

Editór        : Cancio Ximenes      

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here